ރައްޔިތުންގެ މަޖިލީހުގައި ސަލާމަތީ ހިދުމަތްތަކަށް ފާރަވެރިވުމަށް ގާނޫނު އަސާސީން ބާރު ލިބިފައިވާ 241 ކޮމިޓީއަށް 13 މެންބަރުން އަދި މަޖިލީހުގެ އެހެން ދާއިމީ ކޮމިޓީތަކަށް 11 މެންބަރުން ކަނޑައަޅަން މަޖިލީހުން މިއަދު ފާސްކޮށްފި އެވެ.
ސަރުކާރު ހިންގާ ޕީއެންސީގެ ސުޕަ މެޖޯރިޓީއާ އެކު މިއަދު ފެށި 20 ވަނަ މަޖިލީހުގެ ފުރަތަމަ ޖަލްސާއަށް އެ ގޮތަށް ހުށަހެޅުއްވީ ޕީއެންސީގެ ޕާލިމެންޓްރީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހެވެ.
ފަލާހުގެ ހުށަހެޅުއްވުން ފާސްކުރީ 88 މެންބަރުންގެ ވޯޓުންނެވެ. ފާސްކުރަން ނުފެންނަ ކަމަށް މެންބަރަކު ވޯޓެއް ނުދެއްވަ އެވެ.
އެ ކޮމިޓީތަކުގައި ހިމެނޭ މެންބަރުންގެ ނަންތައް މިއަދު ފާސްކޮށްފައެއް ނުވެ އެވެ. ފަލާހު ހުށަހެޅުއްވީ އަންނަ އާދީއްތަ ދުވަހުގެ ނިޔަލަށް ޕާޓީތަކަށް ނަން ހުށަހަޅަން ފުރުސަތު ހުޅުވާލުމަށެވެ. މަޖިލީހުގެ ތަޅުމުން މިއަދު ފާސްކުރީ ފަލާހުގެ އެ ހުށަހެޅުއްވުމަށެވެ.
ކޮމިޓީތަކުގައި ޕާޓީތައް ތަމްސީލްވާނެ ގޮތެއް ވެސް އަދި ފާހެއް ނުކުރެ އެވެ. މަޖިލީހުގެ ބޮޑު މެޖޯރިޓީއެއް ޕީއެންސީއަށް އޮތުމުން ބެލެވޭ ގޮތުގައި އެ ނިސްބަތަށް ކޮމިޓީތަކުގެ މެޖޯރިޓީ ދޭނީ އެ ޕާޓީއަށެވެ. އެއީ ރާއްޖޭގެ ތާރީހަށް ބަލާއިރު، މަޖިލިސްތަކުގައި އާންމުކޮށް އަމަލުކުރާ ވެސް ގޮތެވެ.
އާ މަޖިލީހުން، 19 ވަނަ މަޖިލީހުން އަމަލު ކުރަމުން ދިޔަ ގަވާއިދަށް ގެންނަން ޖެހޭ ކަމަށް މެންބަރުންނަށް ފެންނަ އިސްލާހުތައް ގެންނަން ދެން، ކުރިން އޮތް ގަވާއިދަށް އަމަލު ކުރަން ވެސް ފާސްކޮށްފަ އެވެ.
މިހާރު އޮތް މަޖިލީހުގައި 93 މެންބަރުން ތިއްބަވާއިރު ޕީއެންސީ ތަމްސީލްކުރައްވާ 75 މެންބަރުން ތިއްބަވަ އެވެ. އެމްޑީއޭގެ ދެ މެންބަރަކާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްއެންޕީގެ ރައީސް މުހައްމަދު ނާޒިމް ވެސް ސަރުކާރާ އެކު މަސައްކަތް ކުރައްވާނެ އެވެ.
ސަރުކާރުން ބޭނުންވާ ގޮތަށް މި މަޖިލީހުގައި ވޯޓު ދެއްވާނެ މެންބަރުންގެ އަދަދު 79 އަށް އަރަ އެވެ. ރިޔާސަތު ނުހިމަނާ އެއީ 78 އެވެ. އިދިކޮޅު އެމްޑީޕީގެ 12 މެންބަރުންނާއި އެއްވެސް ޕާޓީއަކަށް ނިސްބަތްވާ ނުވަ ދެ މެންބަރަކު މަޖިލީހުގައި ތިއްބަވަ އެވެ.
