ތޫފާން "ރީމާލް" ބަންގްލަދޭޝްއާއި އިންޑިއާއަށް އަރައި، 16 އަށްވުރެ ގިނަ މީހުން މަރުވެއްޖެ އެވެ.
ބަންގްލަދޭޝްގެ މިނިސްޓާ ފޯ ޑިޒާސްޓާ މޮހިބުއްރް ރަހްމާންއާ ހަވާލާދީ އޭއެފްޕީއިން ބުނީ ތޫފާނުގައި އެ ގައުމުން މިހާތަނަށް 10 މީހުން މަރުވެފައިވާ ކަމަށާއި، އޭގެ ތެރެއިން ގިނަ މީހުން މަރުވީ ގެނބިގެން ކަމަށެވެ.
އިންޑިއާގެ ވެސްޓް ބެންގާލްގައި ހަ މީހުން ތޫފާނުގެ ސަބަބުން މަރުވި ކަމަށް އެ ގައުމުން ބުނެ އެވެ. އަދި ތޫފާނުގެ ސަބަބުން އެ ސަރަހައްދުގެ ގެތައް ވެސް ވަރަށް ބޮޑަށް ސުންނާފަތިވި އެވެ.
ތޫފާނާގެ އަސަރު ބަންގްލަދޭޝްގެ 3.75 މިލިއަން މީހުންނަށް ކޮށްފައިވާއިރު، 50،000 އަށްވުރެ ގިނަ ގެ ވަނީ އެއްކޮށް ސުންނާފަތިވެފަ އެވެ. އަދި އަށް ލައްކައަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
ތޫފާން ރީމާލްގެ ބާރު މިހާރު ކުޑަވެފައިވީ ނަމަވެސް، އިންޑިއާ އަދި ބަންގްލަދޭޝްގެ އެކި ހިސާބުތަކަށް އަދިވެސް މޫސުން ވަރަށް ގޯހެވެ.
ބަންގްލަދޭޝް އަދި އިންޑިއާގައި ތޫފާނުގެ އަސަރުކުރި ސަރަހައްދުތަކުގައި ރެސްކިއު ޓީމުތަކުން ހަރަކާތްތެރިވަމުން އަންނައިރު، އެހީތެރިކަން އަންނަނީ ފޯރުކޮށްދެމުންނެވެ.
