ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުގައި, މުޖުތަމައުއާ ގުޅުމަށް ތައްޔާރަށް ތިބި މީހުންނަށް ހާއްސަކޮށްގެން ރީއިންޓެގްރޭޝަން ވޯޑެއް ހުޅުވައިފި އެވެ.
އިޖުތިމާއީ މިނިސްޓްރީން ބުނީ, 10 މީހުންގެ ޖާގައިިގެ, މި ވޯޑަކީ ނަފްސާނީ ބައްޔަށް ފަރުވާ ހޯދަމުންދާ އަދި މުޖުތަމައަށް ނިކުތުމަށް ތައްޔާރަށް ތިބި އަންހެނުންނަށް ހާއްސަކޮށްގެން ހުޅުވި ވޯޑެއް ކަމަށެވެ.
ބަދިގެއާއެކު ބޭނުންކުރެވޭ ގޮތަށް ގެއެއް ގޮތަށް ފަރުވާ ކޮށްފައިވާ މި ވޯޑު ހުޅުވުމުގެ ބޭނުމަކީ ގޭތެރޭގެ ދިރިއުޅުމުގައި ބޭނުންކުރާ ހުނަރުތަކާއި އާންމު އިޖުތިމާއީ ހުނަރުތައް ދަސްކޮށްދިނުމެވެ.
މީގެ އިތުރުން ފިރިހެނުންނަށް ހާއްސަ 14 އެނދުގެ އެފަދަ އެހެން ވޯޑެއް އަންނަ މަހު ހުޅުވުމަށް ތައްޔާރުވުން އަންނަ ކަމަށް ވެސް މިނިސްޓްރީން ބުނެ އެވެ.
މިނިސްޓްރީން ބުނި ގޮތުގައި ރީއިންޓެގްރޭޝަން ވޯޑުގައި ތިބޭނީ ގުރައިދޫ މަރުކަރުގައި ތިބި, ސިއްހީ, ނަފްސާނީ އަދި އިޖުތިމައީ ހުނަރު ފްރޮގްރާމުތަކާއެކު ފަރުވާ ފުރިހަމަ ކޮށްފައިވާ މީހުންނެވެ.
އާ ހުނަރުތައް ދަސްކޮށްދިނުމުގެ ގޮތުން, ޕޮލިޓެކްނިކާ ގުޅިގެން ގުރައިދޫ މަރުކަޒުން ވަނީ ކޭކު ކޯހެއް ކުރިއަށް ގެންގޮސްފަ އެވެ.
ގުރައިދޫ މަރުކަޒުގައި މިހާރު 220 މީހުން ތިބިއިރު އޭގެ ތެރޭގައި ހިމެނެނީ 133 ފިރިހެނުންނާއި, 87 އަންހެނުންނާއި، އެނދުމަތިވެފައިވާ 15 މީހުން އަދި ނަފްސާނީ ގޮތުން ބަލި 183 މީހުންނެވެ. މީގެ ތެރޭގައި 65 އަހަރުން މަތީގެ 31 މީހުން ހިމެނެ އެވެ.
