ރ. އުނގޫފާރުގައި ކަރަންޓު ލީކުވެ، ކުދިންތަކެއް ކަރަންޓުގައި ޖެހުނު ހާދިސާއާ ގުޅިގެން މުޅި ރާއްޖޭގައި އިންސްޕެކްޝަނެއް ހަަދަން ފެނަކަ ކޯޕަރޭޝަނުން މަސައްކަތް ފަށައިފި އެވެ.
ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު "އަދަދު" އަށް ވިދާޅުވީ އުނގޫފާރުގައި ކުދިންތަކެއް ކަރަންޓު ޖެހުމުގެ ހާދިސާގައި، މަގުމަތީ އޮތް ފެންގަނޑަކަށް ކަރަންޓު ލީކްވީ، ކަރަންޓު ނަރެއް ހޮޅިދަނޑީގައި ޖެހިފައި ހުރުމުން ކަމަށެވެ.
އެފަދަ ހާދިސާތައް ހިނގުން ހުއްޓުވުމަށް ޓަކައި، ފެނަކައިން ހިދުމަތް ދެމުން އަންނަ ރަށްރަށުގައި ކުރިއަށްގެންދާ އިންސްޕެކްޝަންގައި ހޮޅިދަނޑިތަކުގައި ކަރަންޓުގެ މިފަދަ މައްސަލައެއް ހުރިތޯ ބަލައި، އާތު ލީކޭޖް ސާކިޓް ބްރޭކާ (އީއެލްސީބީ) ހަރުކޮށްފައި ހުރިތޯ ބަލާނެ ކަމަށެވެ.
"މަގުބައްތިތައް މި ބަލަހައްޓަނީ ކައުންސިލްތަކުން. މަގުބައްތިތައް އަޅުގަނޑުމެން ބަލާލިއިރު ވާގޮތަކީ ބައެއް މަގުބައްތިތަކުގައި އީއެލްސީބީ ހަރުނުކޮށް ހުރިކަން ވަނީ ފާހަގަވެފައި. އިންސްޕެކްޝަންގައި ޕަބްލިކް ތަންތަނުގައި މިގޮތަށް އީއެލްސީބީ ހަރުނުކޮށް ހުރިތޯ އަޅުގަނޑުމެން ބަލާނަން،" މުއާޒް ބުންޏެވެ.
މި ހަފްތާ ތެރޭގައި އިންސްޕެކްޝަން ނިމޭނެކަން ފާހަގަކުރައްވައި މުއާޒް ވިދާޅުވީ ފާހަގަކުރެވޭ ތަންތަން ވަކި މުއްދަތެއްގައި ރަނގަޅު ކުރުމަށް ކައުންސިލްތަކަށް އަންގާނެ ކަމަށާއި، އެ މުއްދަތުގައި ކައުންސިލްތަކުން އެކަން ނުކޮށްފިނަމަ ކަރަންޓުގެ ހިދުމަތް އެތަނަކަށް މެދުކަނޑާލާނެ ކަމަށެވެ.
ފެނަކައިން ރާއްޖޭގެ 157 ރަށަކަށް ކަރަންޓުގެ ހިދުމަތް ދެމުން އަންނައިރު، އެ ރަށްރަށުގައި ހުންނަ މަގުބައްތިތައް ބަލަހައްޓަމުން އަންނަނީ ކައުންސިލްތަކުންނެވެ.
އުނގޫފާރުގައި ހިނގި ހާދިސާގައި ކަރަންޓުގައި ދެ ކުދިންގެ އިތުރުން 18 އަހަރުގެ ޒުވާނެއް ވެސް ޖެހުނެވެ. އޭގެ ތެރެއިން ދެ ކުދިންނަށް ފަރުވާ ދިނުމށްފަހު ހޮސްޕިޓަލުން ދޫކޮށްލާފައިވާއިރު، ވެންޓިލޭޓަރުގައި ފަރުވާ ދެމުން އަންނަ ޒުވާނާ ވަނީ އިތުރު ފަރުވާއަށް މާލެ ގެނެސްފަ އެވެ.
