އިންޑިއާގެ ސްޓޭޓެއް ކަމަށްވާ ގުޖުރާތުގައި އިއްޔެ ހިނގި އަލިފާނުގެ ހާދިސާއެއްގައި 24 މީހުން މަރުވެއްޖެ އެވެ.
އިންޑިއާ ސަރުކާރުގެ އޮފިޝަލަކާ ހަވާލާދީ އަލްޖަޒީރާ ބުނީ އަލިފާނުގެ ހާދިސާ ހިނގާފައި ވަނީ އާއިލާ މީހުން މުނިފޫހިފިލުވަން ހާއްސަ ތަނެއްގައި ކަމަށެވެ.
ގުޖުރާތުގެ ރާޖްކޮޓް ޑިސްޓްރިކްޓްގެ މޭޔަރު ނަޔަނާ ޕެދަޑިޔާއާ ހަވާލާދީ ރޮއިޓާސްއިން ބުނީ ރެސްކިއު ޓީމުތަކުން އަންނަނީ އެ ސަރަހައްދުގައި ހަރަކާތްތެރިވަމުން ކަމަށާއި، ހާދިސާއާ ގުޅިގެން ޒިންމާވާންޖެހޭ ފަރާތްތަކަށް ހަރުކަށި ފިޔަވަޅު އަޅާނެ ކަމަށެވެ.
އަލިފާނުގެ ހާދިސާ ހިނގިއިރު އެތަނުގައި 300 އެއްހާ މީހުން ތިބިއިރު، އެތަން ވަނީ އެއްކޮށް އަނދާ ހުލިވެފަ އެވެ. އަދި މަރުވި މީހުންގެ އަދަދު އިތުރުވާނެ ކަމަށް ކަމާ ބެހޭ ފަރާތްތަކުން ލަފާކުރެ އެވެ.
"ހާދިސާގައި ބައެއް މީހުން ވަނީ އެތެރޭގައި ތާށިވެފައި. އެމީހުން ސަލާމަތްކުރަން އަންނަނީ މަސައްކަތް ކުރަމުން. ބައެއް މީހުން ގެއްލިގެން ވެސް ރިޕޯޓު ކޮށްފައިވޭ،" ރާޖްކޮޓް ފަޔާ ޑިޕާޓްމަންޓުގެ އޮފިސަރަކު ބުންޏެވެ.
އެތަނުގެ އަލިފާން މިހާރު ވަނީ ކޮންޓްރޯލްކޮށްފަ އެވެ. އަދި ހާދިސާ ހިނގަން މެދުވެރިވި ސަބަބެއް މިހާތަނަށް ދެނެގަނެވިފައެއް ނުވެ އެވެ.
