އިންޑިއާގެ އާންމު އިންތިހާބުގެ ފޭސް ހައެއްގެ ވޯޓުލުން މިއަދު ފަށައިފި އެވެ.
ފޭސް ހައެއްގައި އިންޑިއާގެ އަށް ސްޓޭޓުގެ 49 ގޮނޑިއަށް މެމްބަރުން އިންތިހާބުކުރަން ވޯޓުލާނެ އެވެ.
މި ފޭސްގައި ވޯޓުލާ ސްޓޭޓުތަކުގެ ތެރޭގައި ހަރްޔާނާ، އޮޑިޝާ، އުއްތަރަޕްރަދޭޝް، ބިހާރު، ވެސްޓް ބެންގާލް، ދިއްލީކަ އަދި ކަޝްމީރު ހިމެނެ އެވެ.
ކަޝްމީރުގައި ވޯޓުލާން ކުރިން ހަމަޖެހިފައި އޮތީ ފޭސް ތިނެއްގަ އެވެ. ނަމަވެސް އެ ހިސާބުގައި މޫސުން ގޯސްވުމުގެ ސަބަބުން ވޯޓުލުން ފޭސް ހަޔަކަށް ބަދަލުކުރީ އެވެ.
އިންތިހާބުގެ ފުރަތަމަ ފޭސްގައި 102 ގޮނޑިއަށް ވޯޓުލާފައިވާއިރު، ދެވަނަ ފޭސްގައި 88 ގޮނޑިއަށް މެމްބަރުން އިންތިހާބުކުރަން ވަނީ ވޯޓުލާފަ އެވެ. އަދި ތިންވަނަ ފޭސްގައި 93 ގޮނޑިއަށް ވޯޓުލާފައިވާއިރު، ހަތަރުވަނަ ފޭސްގައި 96 ގޮނޑިއަށް މެމްބަރުން ވަނީ އިންތިހާބުކުރަން ވޯޓުލާފަ އެވެ.
ޖުމްލަ ހަތް ފޭސްއަކަށް ބަހާލައިގެން ކުރިއަށްގެންދާ އިންތިހާބުގެ ފޭސް ފަހެއްގައި 49 ގޮނޑިއަކަށް މެމްބަރުން އިންތިހާބުކުރަން ވޯޓުލާފައިވާއިރު، ފަހު ފޭސްގައި 57 ގޮނޑިއަކަށް މެމްބަރުން އިންތިހާބުކުރަން ވޯޓުލާނެ އެވެ.
އިންތިހާބުގައި 543 ގޮނޑިއަކަށް މެމްބަރުން އިންތިހާބުކުރާއިރު، 969 މިލިއަނެއްހާ މީހުންނަށް އިންތިހާބުގައި ވޯޓުލުމުގެ ހައްގު ވަނީ ލިބިފަ އެވެ.
އިންޑިއާގައި 2019 ގައި ބޭއްވި އާންމު އިންތިހާބުގައި 67 ޕަސަންޓު މީހުން ވަނީ ވޯޓުލާފަ އެވެ. އެއީ ވޯޓުލުމުގެ ހައްގު ލިބިފައިވާ 615 މިލިއަން މީހުންގެ ވޯޓެވެ.
