ރ. އުނގޫފާރުގައި މަގުބައްތި ހޮޅި ދަނޑިއަކުން ކަރަންޓުގައި ޖެހުނު ދެ ކުދިން ސަލާމަތް ކުރި ޒުވާނާއަށް ފަރުވާދެނީ ވެންޓިލޭޓަރުގައި ކަމަށް އެ ރަށު ކައުންސިލުން ބުނެފި އެވެ.
އުނގޫފާރު ކައުންސިލް މެމްބަރު މުހައްމަދު މުނީޒް "އަދަދު" އާ ވާހަކަދަމުން ވިދާޅުވީ ކަރަންޓުގައި ޖެހުނު އަށް އަހަރުގެ ފިރިހެން ކުއްޖާ އާއި 12 އަހަރުގެ އަންހެން ކުއްޖާއަށް ފަރުވާ ދިނުމަށްފަހު ހޮސްޕިޓަލުން ދޫކޮށްލާފައިވާ ކަމަށެވެ.
ނަމަވެސް ކަރަންޓުގައި ޖެހުނު 18 އަހަރުގެ ފިރިހެން ކުއްޖާއަށް އުނގޫފާރު ހޮސްޕިޓަލުގެ އައިސީޔޫގައި ފަރުވާ ދެމުން އަންނައިރު، އެ ޒުވާނާ އޮތީ ވެންޓިލޭޓަރުގައި ކަމަށް މުނީޒް ވިދާޅުވި އެވެ. އެއީ އޯޓިސްޓިކް ޒުވާނެއް ކަމަށް ކައުންސިލުން ބުނެ އެވެ.
"ޑޮކްޓަރު ބުނާ އެއްޗަކަށް ބަލާފައި އިތުރު ފަރުވާއަށް މާލެ ވެސް ގެންދަން ޖެހިދާނެ. މިހާރު މަޑުކުރަނީ ޑޮކްޓަރު ބުނާ އެއްޗަކަށް،" މުނީޒް ބުންޏެވެ.
އުނގޫފާރުން މި ނޫހާ ވާހަކަ ދެއްކި މީހަކު ބުނީ އެ ކުދިން ކަރަންޓުގައި ޖެހުނީ ކުޑަކުދިންގެ ޕާކު ކައިރީ ފެންގަނޑެއްގައި ކުޅެނިކޮށް އެތާހުރި މަގުބައްތިއަކުން ކަމަށެވެ.
