ރ. އުނގޫފާރުގައި މަގުބައްތި ހޮޅި ދަނޑިއަކުން ދެ ކުޑަކުދިންނާއި މީހަކަށް ކަރަންޓު ޖެހި، ހޮސްޕިޓަލުގައި ފަރުވާ ދޭން ފަށައިފި އެވެ.
އުނގޫފާރު ކައުންސިލް މެމްބަރު މުހައްމަދު މުނީޒް "އަދަދު" އާ ވާހަކަދަމުން ވިދާޅުވީ ކަރަންޓުގައި ޖެހުނީ 18 އަހަރުގެ ފިރިހެނަކާއި، 12 އަހަރުގެ އަންހެން ކުއްޖެއްގެ އިތުރުން އަށް އަހަރުގެ ފިރިހެން ކުއްޖެއް ކަމަށެވެ.
ކަރަންޓުގައި ޖެހުނު ދެ މީހުންގެ ހާލު ރަނގަޅު ކަމަށާއި، ނަމަވެސް 18 އަހަރުގެ މީހާގެ ހާލު ސީރިއަސްކަމުން ފަރުވާ ދެމުން އަންނަނީ އައިސީޔޫގައި ކަމަށް އޭނާ ބުންޏެވެ.
"18 އަހަރުގެ މީހާގެ ހާލު ސީރިއަސް. އިތުރު ފަރުވާއަށް މާލެ ފޮނުވާލަން ޖެހޭ ކަމަށް ބެލެވޭ،" މުހައްމަދު މުނީޒް ބުންޏެވެ.
އުނގޫފާރުން "އަދަދު" އާ ވާހަކަ ދެއްކި މީހަކު ބުނީ އެ ކުދިން ކަރަންޓުގައި ޖެހުނީ ކުޑަކުދިންގެ ޕާކު ކައިރީ ފެންގަނޑެއްގައި ކުޅެނިކޮށް އެތާހުރި މަގުބައްތިއަކުން ކަމަށެވެ.
އޭނާ އިތުރަށް ބުނީ 18 އަހަރުގެ މީހާ ކަރަންޓުގައި ޖެހުނީ ދެ ކުދިން ކަރަންޓުގައި ޖެހިފައި ތިއްބާ ސަލާމަތް ކުރަން މަސައްކަތް ކުރަނިކޮށް ކަމަށެވެ. ނަމަވެސް ފުލުހުން ބުނަނީ އެ މީހާއަކީ އެ ކުދިން ކަރަންޓުގައި ޖެހުނު ތަން ފެނިގެން ހޭނެތުނު މީހެއް ކަމަށެވެ.
