މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަންގެ ޑިރެކްޓަރުންގެ ބޯޑުގައި މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (މަޓީ) ތަމްސީލުކުރައްވާ ރާފިލް މުހައްމަދު ވެސް އެ ކުންފުނީގެ ބޯޑުން އިސްތިއުފާ ދެއްވައިފި އެވެ.
ރާފިލް އިސްތިއުފާދެއްވިކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ "އަދަދު" އަށް ކަށަވަރުކޮށްދީފަ އެވެ.
އެމްއެމްޕީއާރުސީގެ ބޯޑު މެންބަރުގެ މަގާމަށް ރާފިލް އައްޔަންކޮށްފައި ވަނީ މީގެ ތިން މަސް ކުރިންނެވެ. އޭނާ އިސްތިއުފާ ދެއްވި ސަބަބެއް ކަށަވަރެއް ނުވެ އެވެ. ރާފިލް އަކީ 2018 އިން ފެށިގެން މަޓީގެ އެގްސެކެޓިވް ޑިރެކްޓަރުގެ މަގާމުގައި ހުންނެވި ބޭފުޅެކެވެ.
އޭނާގެ އިސްތިއުފާގެ ސިޓީ ފޮނުވާފައި މިވަނީ އެ ކުންފުނީގެ ޗެއާޕާސަންގެ މަގާމުގައި ހުންނެވި އައިޝާ ނޫރައިން ޖަނާހު ރޭ އެ މަގާމާއި ކުންފުނީގެ ބޯޑު މެންބަރުކަމުން ރޭ އިސްތިއުފާދެއްވާފައިވަނިކޮށެވެ. އެކަން ޕީސީބީއިން މިއަދު ވަނީ ސޯޝަލް މީޑިއާގައި ކަށަވަރުކޮށްދީފަ އެވެ.
ޕްރިންސިޕަލް އެޑްވައިޒާ އޮން ޓްރޭޑް އެންޑް އިންވެސްޓްމަންޓު މުހައްމަދު އަލީ ޖަނާހުގެ ދަރިކަނބަލުން، ނޫރައިން އެމްއެމްޕީއާރުސީގެ ޗެއާޕާސަންގެ މަގާމަށް އައްޔަން ކުރީ ޑިސެމްބަރު 27، 2023 ގަ އެވެ.
ރާއްޖޭ ޓޫރިޒަމް އިޝްތިހާރު ކުރަން އުފައްދާފައިވާ ސަރުކާރުގެ 100 ޕަސެންޓު ހިއްސާ އޮންނަ އެމްއެމްޕީއާރުސީގެ މެނޭޖިން ޑިރެކްޓަރަކީ ފާތިމަތު ތައުފީގެވެ.
