މި މަހު 28 ގައި ހުވާކުރާ ރައްޔިތުންގެ މަޖިލީހަށް އިންތިހާބުވެފައިވާ ޕީއެންސީގެ މެންބަރުންނާ ރައީސް ޑރ. މުހައްމަދު މިއަދު ހަވީރު ބައްދަލުކުރައްވަން ނިންމަވައިފި އެވެ.
"އަދަދު" އަށް މައުލޫމާތު ލިބިފައިވާ ގޮތުގައި މި ބައްދަލުވުން އޮންނާނީ މިއަދު ހަވީރު 4:00 ގައި މުލިއާގޭގަ އެވެ. މި ބައްދަލުވުމުގައި ޕީއެންސީ ގެ ޓިކެޓުގައި އިންތިހާބުވި މެންބަރުންނާއި އިންތިހާބަށްފަހު އެ ޕާޓީއާ ގުޅުނު ހުރިހާ މެންބަރުން ބައިވެރިވާނެ އެވެ.
މީގެއިތުރުން، ސަރުކާރާއެކު މަސައްކަތް ކުރާ ޕާޓީތަކުގެ މެންބަރުންވެސް މިއަދުގެ ބައްދަލުވުމުގައި ބައިވެރިވުން އެކަށީގެންވެ އެވެ.
މިއަދުގެ ބައްދަލުވުމުގައި ކުރިއަށް އޮތް މަޖިލީހުގެ ރައީސް އަދި ނައިބު ރައީސް ކަމަށް ހޮވުމަށް ރައީސް މުއިއްޒު އެދިލައްވާ މެންބަރުންގެ ނަން ހާމަކުރައްވާނެ ކަަމަށް މައުލޫމާތު ލިބެ އެވެ.
އެޕްރީލް 21، ގައި ބޭއްވި މަޖިލިސް އިންތިހާބުގައި ޕީއެންސީއިން 66 ގޮނޑިއެއް ކާމިޔާބު ކުރި އިރު، އިންތިހާބު ކާމިޔާބު ކުރި އަށް މެންބަރަކު ވަނީ އޭގެ ފަހުން އެ ޕާޓީއަށް ސޮއިކޮށްފަ އެވެ. އެއާއެކު މި ވަގުތު ޕީއެންސީގެ ޕީޖީ ގްރޫޕުގައި 74 މެންބަރުން އެބަތިއްބެވެ.
މީގެ އިތުރުން ސަރުކާރާއެކު މަސައްކަތް ކުރާ ޕާޓީތަކުގެ މެންބަރުންގެ ގޮތުގައި ހިމެނެނީ ޖޭޕީގެ ލީޑަރު ގާސިމް އިބްރާހިމް އާއި އެމްއެންޕީގެ ލީޑަރު މުހައްމަދު ނާޒިމްގެ އިތުރުން އެމްޑީއޭގެ ލީޑަރު އަހުމަދު ސިޔާމް މުހައްމަދުގެ އިތުރުން އެ ޕާޓީއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް އެވެ.
މިއާއެކު 20 ވަނަ މަޖިލީހުގައި ސަރުކާރުން ބޭނުންވާ ގޮތަށް ވޯޓު ދޭން މަޖިލީހުގައި ތިބޭނެ މެމްބަރުންގެ އަދަދު ވަނީ 78 އަށް އަރަ އެވެ. މިއީ މިދިޔަ މަޖިލީހުގައި އެމްޑީޕީއަށް ލިބުނު ވަރަށް ވުރެ ވެސް ބޮޑު އަގުލަބިއްޔަތެކެވެ.
