ގާ ހުދުވަމުން (ކޮރަލް ބްލީޗިން) ދާތީ ފަރުތަކަށް ސްޓްރެސް ބޮޑުވާ ފަދަ އެންމެހައި މަސައްކަތްތައް ހުއްޓާލަން އަންގާފައި ވަނިކޮށް، ކ. ވާވެއްދިފަޅު ހިއްކުމުގެ މަސައްކަތް ކުރަމުންދާ ކަމުގެ މައުލޫމާތު ލިބިއްޖެ އެވެ.
ކަނޑުތަކުގެ ލޮނުގަނޑުގެ ހޫނުމިން މަތިވެ ގާ ހުދުވަމުން ދާތީ ފަރުތަކަށް ސްޓްރެސްވާ ހުރިހާ މަސައްކަތެއް ވަގުތީ ގޮތުން މަޑުޖައްސާލަން އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން އެންގީ، މި މަހު 9 ގައި ކުރި އިއުލާނެއްގަ އެވެ.
އެ އިއުލާނުގައި އީޕީއޭ އިން އެންގީ، ބިން ހިއްކުމާއި ފަޅުކޮނުމާއި ގޮނޑުދޮށަށް ވެލި އެޅުމުގެ އިތުރުން ޕަމްޕު ބޭނުންކޮށްގެން ވެލި ނެގުމާއި ފަރުމަތީ ހޮޅި އަދި ކޭބަލް އެޅުމާއި ބަންޑުވޯލް ޖެހުމާއި މި ނޫނަސް މެޝިނަރީ ބޭނުންކޮށްގެން ފަރުމަތީގައި މަސައްކަތް ކުރުން އަންނަ މަހުގެ 10 އާ ހަމައަށް ހުއްޓާލުމަށެވެ.
މިހެން ނަމަވެސް، މިހާރު ވެސް ރާއްޖޭގެ އެކި ކަންކޮޅުތަކުގައި ބިން ހިއްކުމާއި ވެލި ނެގުމުގެ މަސައްކަތް ކުރަމުންދާ ކަމަށް އާންމުން އަންނަނީ ޝަކުވާ ކުރަމުންނެވެ. މިކަހަލަ ރިޕޯޓުތަކެއް ލިބިގެން އީޕީއޭ އިން އެ މައްސަލަތައް ބަލަމުން އަންނަ ކަމަށް ވެސް ބުނެފައިވެ އެވެ.
ބިން ހިއްކުން ހުއްޓާލަން އަންގާފައި އޮއްވާ ވާވެއްދިފަޅު ހިއްކުމުގެ މަސައްކަތް ކުރިޔަށްދާ ސަބަބު ސާފުކުރަން އެންވަޔަރަމަންޓް މިނިސްޓްރީގައި ސުވާލުކުރުމުން، މިނިސްޓަރު ތޯރިގު އިބްރާހިމް ވިދާޅުވީ އެ މަސައްކަތް ކުރަމުންދަނީ އީޕީއޭއަށް ހުށަހަޅައިގެން، އެ އިދާރާއިން ދޫކުރާ ހާއްސަ ހުއްދައެއްގެ ދަށުން ކަމަށެވެ.
ތޯރިގު ވިދާޅުވީ، ހިނގަމުންދާ މަޝްރޫއުތަކުގެ މަސައްކަތް ކުރިއަށް ގެންދަން ހާއްސަ ހުއްދަ ދެމުން ދަނީ ވަކިވަކިން ކޮންމެ ހުށަހެޅުމެއް ބަލައިފަައި އެއީ ކޮންމެހެން ދޫކުރަން ޖެހޭ ހުއްދައެއް ނަމަ ކަމަށެވެ. މިފަދަ ގިނަ ހުށަހެޅުންތަކަކީ ވިޔަފާރީގެ އެއްބަސްވުމަކަށް އަމަލުނުކުރުމުގެ އިހުތިމާލު އެކުލެވޭ ހުށަހެޅުންތައް ކަމަށް ވެސް އޭނާ ވިދާޅުވި އެވެ.
"އެގޮތަށް ރިކުއެސްޓް ކުރާ އެއްޗެހިތަކުގެ ތެރޭގައި އެބަ ހުރޭ ބޮޑެތި ކޮންޓްރެކްޓްސް ހަދާފައި. ކޮންޓްރެކްޓަރުންނާ ހަދާފައި ހުންނަ ކޮންޓްރެކްޓުތައް ދޭ ކެނޮޓް ގެޓް އަވޭ ފްރޮމް. މިސާލަކަށް ޑެއިލީ ހުންނާނެތާ ބޮޑެތި ސަމްސް ޕެނަލްޓީގެ ގޮތުގައި ދައްކަން ޖެހޭ," ތޯރިގު ވިދާޅުވި އެވެ.
އީޕީއޭ އިން މި ހުށަހެޅުންތައް ވަޒަންކޮށް ހުއްދަ ދިނުމުގައި ބަލަނީ ޕްރޮޖެކްޓުގެ މަސައްކަތް ހުއްޓާލުމުން ލިބިދާނެ މާލީ ގެއްލުމަކަށެވެ. ތޯރިގު ވިދާޅުވީ ވާވެއްދި ފަޅު ހިއްކުމުގެ މަސައްކަތް ކުރިއަށް ގެންދަން ހުއްދަ ދިނީ އެގޮތުގެ މަތިން އީޕީއޭއިން ބަލަން ޖެހޭ ކަންކަން ބަލާފައި ކަމަށެވެ.
ގާ ހުދުވުމުގެ މައްސަލަތައް ދިމާވާތީ ބިން ހިއްކުން ފަދަ މަސައްކަތް ވަގުތީ ގޮތުން ހުއްޓާލަން އެންގި އެންގުމަށް ތަބާވާން މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީން ވެސް ވަނީ ގޮވާލާފަ އެވެ.
ވާވެއްދި ފަޅުގައި ރިސޯޓު ތަރައްގީކުރުމުގެ މަސައްކަތް ކުރަމުން ދަނީ ގަތަރުގެ އެސްތިސްމާރު ހޯލްޑިންސްގެ ދަށުން އޮންނަ، ރެޒިއާނާ ފޯ ރިސޯޓް ޑިވެލޮޕްމަންޓްސް އެލްއެލްސީ އިންނެވެ. އެ ކުންފުނިން މި ފަޅުގައި ހިންގާ 5.3 ބިލިއަން ރުފިޔާގެ ބިޔަ ޕްރޮޖެކްޓުގެ ދަށުން ހުޅުވަނީ މަޝްހޫރު ހޮޓެލް ޗެއިން "ރޯސްވުޑް" ބްރޭންޑިންގަ އެވެ.
މި ފަޅު އެ ކުންފުނިން ގަތީ މިދިޔަ އަހަރުގެ ތެރޭގަ އެވެ. މި ފަޅުގެ މައްސަލަ އާންމުންގެ ސަމާލުކަމަށް އައީ ރިޔާސީ އިންތިހާބުގައި ވޯޓުލާން ކައިރިވެފައި ވަނިކޮށް އެ ފަޅު ވިއްކާލުމުގެ މުއާމަލާތް ހުއްޓުވަން އެންޓި ކޮރަޕްޝަން ކޮމިޝަނުން އަމުރު ކުރުމުންނެވެ.
