އިރާންގެ އާ ރައީސް އިންތިހާބު ކުރުން ޖޫން 28 ގައި ބޭއްވުމަށް ނިންމައިފި އެވެ.
އެ ގައުމުގެ ދައުލަތުގެ މީޑިއާއާ ހަވާލާދީ އޭއެފްޕީއިން ބުނީ އިންތިހާބު ބާއްވާ ދުވަސް ކަނޑައެޅީ އިރާނުގެ ޖުޑީޝަރީ އާއި ސަރުކާރު އަދި ގާނޫނު ހަދާ މަޖިލިސް އެކުގައި ބޭއްވި ބައްދަލުވުމެއްގައި ކަމަށެވެ.
އިރާނުުގެ ރައީސްކަމުގެ މަގާމު ހުސްވީ އެ މަގާމުގައި ހުންނެވި އިބްރާހިމް ރައީސީ ދަތުރުކުރެއްވި ހެލިކޮޕްޓަރު ވެއްޓި އެމަނިކުފާނު އަވަހާރަވުމާ ގުޅިގެންނެވެ. އެއަށް ފަހު ވަގުތީ ރައީސް އަކަށް އައްޔަންކޮށްފައި ވަނީ، ނައިބު ރައީސް މުހައްމަދު މުހްބަރް އެވެ.
ވެއްޓުނު ހެލިކަޕްޓަރުގައި އިރާނުގެ ފޮރިން މިނިސްޓަރު އަދި އިތުރުން މީހުން ވެސް ދަތުރުކުރެއްވި އެވެ. ހާދިސާގައި ހެލިކަޕްޓަރުން ދަތުރުކުރި އެންމެން ވަނީ މަރުވެފަ އެވެ.
ހެލިކޮޕްޓަރު ވެއްޓުނީ ވަރަށް މޫސުން ގޯސްވެފައި ވަނިކޮށެވެ. އަދި ހެލިކޮޕްޓަރު ފެނުނީ ހޯދަމުންދިޔަތާ އެތައް އިރެއް ފަހުންނެވެ.
މިއީ އިރާނުގައި ރައީސަކު ހޮވުމަށް ބޭއްވޭ 14 ވަނަ އިންތިހާބަށް ވާއިރު، އެ ގައުމުގައި މިހާތަނަށް އަށް ރައީސުން ވަނީ ވެރިކަން ކުރައްވައިފަ އެވެ.
