އިންޑިއާ އާންމު އިންތިހާބުގެ މަރުހަލާ ފަހެއްގެ ވޯޓުލުން އިއްޔެ ކުރިއަށް ގެންދިޔައިރު، ވޯޓު ލާފައިވަނީ ހައްގު ލިބޭ މީހުންގެ 60 ޕަސެންޓު ކަމަށް ވަގުތީ ނަތީޖާއިން ދައްކައިފި އެވެ.
މި މަރުހަލާގައި 49 ގޮނޑިއަށް މެންބަރުން އިންތިހާބު ކުރުމަށް ހަ ސްޓޭޓަކާއި ދެ ޔޫނިއަން ޓެރިޓަރީއެއްގައި ވޯޓުލި އެވެ. އެ ދާއިރާތަކުގައި ވޯޓުލުމުގެ ހައްގު ލިބިގެންވާ 89.5 މިލިއަން މީހުން ތިއްބެވެ. އޭގެ ތެރެއިން ވޯޓުލާފައި ވަނީ 60.09 ޕަސެންޓު މީހުންނެވެ.
މި ފޭސްގައި ގިނަ އަދަދެއްގެ މަޝްހޫރު މީހުން ވޯޓުލި އެވެ. އޭގެ ތެރޭގައި ފިލްމީ ތަރިން ވެސް ހިމެނެ އެވެ.
އިންޑިއާގެ އާންމު އިންތިހާބު ޖުމުލަ ހަތް މަރުހަލާ އަކަށް ބަހާލާފައި ވާއިރު، މިހާތަނަށް އޮމާންކަމާއެކު ފަސް މަރުހަލާއެއްގެ ވޯޓުލުން ވަނީ ކުރިއަށް ގެންގޮސް ނިންމާލައިފަ އެވެ. އެއީ އެޕްރިލް، 19 އާއި އެޕްރިލް، 26 އަދި މެއި، 7 ގެ އިތުރުން މެއި، 13 ގަ އެވެ. އަދި އިއްޔެ އެވެ.
އިންތިހާބުގައި ގާނޫނު ހަދާ މަޖިލީހަށް 543 މެންބަރުން އިންތިހާބު ކުރާއިރު، ވޯޓުލުމުގެ ހައްގު 969 މިލިއަނެއްހާ މީހުންނަށް ވަނީ ލިބިފަ އެވެ. މިފަހަރުގެ އިންތިހާބުގައި ފުރަތަމަ ފަހަރަށް 197 މިލިއަނެެއްހާ މީހުންނަށް ވޯޓުލުމުގެ ހައްގު ވަނީ ލިބިފަ އެވެ. އެއީ އަލަށް 20 އަހަރު ފުރުނު މީހުންނެވެ.
އިންޑިއާގެ އިންތިހާބުގައި 2019 ވަނަ އަހަރު 67 ޕަސަންޓު މީހުން ވޯޓުލާފައި ވާއިރު، އެއީ 615 މިލިއަނެއްހާ މީހުންނެވެ.
މި ފަހަރުގެ އިންތިހާބު މިހާރުގެ ބޮޑު ވަޒީރުގެ ނަރެންދުރަ މޯދީގެ ޕާޓީ، ބީޖޭޕީން ކާމިޔާބުކޮށްފި ނަމަ މޯދީ ތިން ވަނަ ދައުރަކަށް ވެސް ބޮޑުވަޒީރެއްގެ ގޮތުގައި ހުންނަވާނެ އެވެ. މޯދީ ވަނީ މި އިންތިހާބު ކާމިޔާބު ކުރައްވާނެ ކަމަށް ވިދާޅުވެފަ އެވެ.
