މި ސަރުކާރުގެ ފަސް އަހަރުގެ ދައުރުގެ ތެރޭގައި ރާއްޖޭގައި މަސް ޕްރޮސެސް ކުރުމަށް ބޭނުންކުރާ ހަކަތައިގެ 35 ޕަސެންޓަކީ އިއާދަކުރަނިވި ހަކަތައަަށް ބަދަލުކުރުމަކީ އަމާޒެއް ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
ތައިލޭންޑުގެ ބެންކޮކްގައި ކުރިއަށްދާ 18 ވަނަ އިންފޯފިޝް ވޯލްޑް ޓޫނާ ކޮންފަރެންސް އެންޑް އެގްޒިބިޝަންގައި ވާހަކަ ދައްކަވަމުން ޝިޔާމް ވަނީ ރާއްޖޭގެ މަސްވެރިކަމުގެ ސިނާއަތަކީ ދެމެހެއްޓެނިވި ސިނާއަތެއްގެ ގޮތުގައި ބޭއްވުމަށް ސަރުކާރުން ކުރަމުންދާ މަސައްކަތްތަކާ ގުޅޭގޮތުން ވާހަކަ ދައްކަވާފަ އެވެ.
"ކަނޑަކީ ރާއްޖޭގެ ދިރުން. ދިވެހިންގެ ލޭނާރު. ރާއްޖޭގެ ދެމިއޮތުމާއި, ދިރިއުޅުމާއި ސަގާފަތާ ވެސް ގުޅިލާމެހިފައި އޮތް ކަމެއް. ދެމެހެއްޓެނިވި މަސްވެރިކަމެއް ކުރުމަށް އެކަމުގެ ސަބަބުން އޮތް ޒިންމާ ބޮޑު. އެއީ ހަމައެކަނި އިގުތިސޯދީ ސަބަބުތަކަށް ނޫން, ދިރިދެމިތިބުމާ ގުޅިފައިވާތީ," ޝިޔާމްގެ ވާހަކަ ފައްޓަވަމުން ވިދާޅުވި އެވެ.
އެކަން ހާސިލުކުރުމުގެ ގޮތުން މި ސަރުކާރުން ފިޝަރީޒް މިނިސްޓްރީއަށް ބަދަލު ގެނެސް އެ މިނިސްޓްރީގެ ދަށުން ކަނޑުގެ ހުރިހާ ދިރުމަކާ ގުޅޭ ކަންކަން ކުރުން ހިމަނާފައިވާކަން ޝިޔާމް ފާހަގަކުރެއްވި އެވެ. މަސްވެރިކަމުގެ ސިނާއަތަށް އާ އީޖާދީ ބަދަލުތައް ގެނެސް, ސިންދަފާތުވުމަށް ފުރުސަތު ދީ, އުފެއްދުންތަކުގެ އަގު އިތުރުކުރުމަށް ހާއްސަ އިސްކަމެއް ދޭ ކަމަށް ޝިޔާމް ވިދާޅުވި އެވެ.
ރާއްޖޭގައި އަހަރެއްގެ މައްޗަށް 100,00 ޓަނަށްވުރެ ގިނަ ކަޅުބިލަމަސް ބާނާ ކަމަށާއި އޭގެ ތެރެއިން 60 ޕަސެންޓަށްވުރެ ގިނަ އަދަދެއް ޕްރޮސެސް ކުރުމަށް ފޮނުވަނީ ބޭރަށް ކަމަށް ޝިޔާމް ފާހަގަކުރެއްވި އެވެ. ސަރުކާރުގެ އަމާޒުހުރީ އެކަން ބަދަލުކުރުމަށް ކަމަށް އޭނާ ވިދާޅުވި އެވެ.
"އަޅުގަނޑުމެން ޔަގީން ކުރަން ބޭނުންވަނީ ރާއްޖެއަކީ ދެން ހަމައެކަނި ރޯ މަސް ބޭރުކުރާ ތަނެއްގެ ގޮތުގައި އޮތުމުގެ ބަދަލުގައި, އަޅުގަނޑުމެންގެ އުފެއްދުންތަކުގެ އަގު އިތުރުކުރުން (ވެލިއު އެޑް ކުރުން). ސަރުކާރުން އިސްކަން ދެނީ އާ މާކެޓުތަކަށް އެކްސްޕޯޓުތައް އިތުރުކުރުމަށް އިންފްރާސްޓްރަކްޗާ ގާއިމުކޮށް މީހުންނަށް އާ ވަޒީފާގެ ފުރުސަތުތައް ހޯދައިދިނުން," ޝިޔާމް ވިދާޅުވި އެވެ.
އެކަން ކުރުމުގެ ގޮތުން ރާއްޖޭގެ އެކި ކަންކޮޅުތަކުގައި މަސް ޕްރޮސެސް ކުރުމަށް ކާރުހަނާ އަޅަމުންދާކަން ޝިޔާމް ފާހަގަކުރެއްވި އެވެ. ދ. މާދެއްޔާއި ގދ. ފިޔޯރީ އަދި ޅ. ފެލިވަރުގައި މަސް ފެކްޓްރީ އަޅަން ސަރުކާރުން ވަނީ ސޮއިކޮށްފަ އެވެ.
