ޓިއުރިން (މެއި 18) - ޔުވެންޓަސްގެ ކޯޗުކަމުން މަސިމޯ އަލެގްރީ ވަކިކުރުމަށް ފަހު، އެ މަގާމަށް ބޮލޯނިއާގެ ކޯޗަކަށް ހުރި ތިއާގޯ މޮޓާ ގެނެވޭތޯ ޔުވެންޓަސް އިން މަސައްކަތް ފަށައިފި އެވެ.
އިޓާލިއަން ކަޕްގެ ޗެމްޕިއަންކަން ޔުވެންޓަސް އަށް ހޯދައިދިންތާ ދެ ދުވަސް ފަހުން އަލެގްރީ ވަކިކުރަން އެ ކްލަބުން ނިންމީ ޑިސިޕްލިނަރީ މައްސަލަތަކަަކަށް ވެސް ބެލުމަށް ފަހު އެވެ.
އެ ގޮތުން، ފައިނަލް މެޗުގެ ފަހު ވަގުތު، މެޗު އޮފިޝަލަކާ ޒުވާބުކުރުމުން އަލެގްރީ އަށް ކާޑު ދައްކައި ދަނޑުން ފޮނުވާލިއިރު، އެ ވަގުތު އޭނާ ވަނީ ސްޕޯޓިން ޑިރެކްޓަރަށް އަތުން ހަނާއަޅައިފަ އެވެ.
އަލެގްރީގެ މި ހަރަކާތްތަކުގެ މައްސަލަ، އިޓަލީ ފުޓްބޯޅަ ފެޑެރޭޝަންގެ ޑިސިޕްލިނަރީ ބޯޑުން އަންނަނީ ބަލަމުންނެވެ. އެއާ އެކު، ޔުވެންޓަސް އިން އިއްޔެ ނިންމާފައިވަނީ އަލެގްރީ އެ ޓީމުގެ ކޯޗުކަމުން ވަގުތުން ދުރުކުރުމަށެވެ.
ޔުވެންޓަސް އިން ކުރިން ނިންމާފައި އޮތީ ސީޒަން ނިމުމުން އަލެގްރީ ވަކިކުރާގޮތަށެވެ. އެކަމަކު، އެ ކްލަބުން ގަބޫލުނުކުރާ އަހުލާގީ މައްސަލަތަކެއް އައުމުން ވަގުތުން ގޮތެއް ނިންމީ އެވެ.
މޮޓާ ވަނީ އިޓާލިއަން ލީގުގެ ގަދަ ހަތަރެއް ބޮލޯނިއާ އަށް ކަށަވަރުކޮށްދީ އެ ޓީމުގެ ތާރީހުގައި ފުރަތަމަ ފަހަރަށް ޗެމްޕިއަންސް ލީގަށް ކޮލިފައިކޮށްދީފައި.--
ޔުވެންޓަސް އިން އިޓާލިއަން ލީގުގެ ފަހު ދެ މެޗުގައި ކުޅެން ޖެހެނީ މޮންޒާ އާއި ބޮލޯނިއާއާ އެވެ. މީގެ ތެރެއިން ބޮލޯނިއާގެ ކޯޗަކަށް ހުރި މޮޓާ އަށް ޔުވެންޓަސް އިން ވަނީ ތިން އަހަރުގެ ކޮންޓްރެކްޓެއް ހުށަހަޅައިފަ އެވެ.
މޮޓާ، ގޮތެއް ނިންމާނީ ސީޒަނަށް ފަހު ކަމަށް ރިޕޯޓްތައް ބުނެ އެވެ.
ބޮލޯނިއާ މި ވަގުތު ލީގުގެ ތިން ވަނައިގައި އޮތީ ހަތަރު ވަނައިގައި އޮތް ޔުވެންޓަސްއާ އެއްވަރަށް، 36 މެޗުން 67 ޕޮއިންޓް ހޯދައިގެންނެވެ.
އަލެގްރީ އެންމެ ފުރަތަމަ ޔުވެންޓަސް ކޯޗަކަށް ހުރީ 2014 އިން 2019 އަށެވެ. އެ މުއްދަތުގައި ކޮންމެ އަހަރަކު، ލީގު ޗެމްޕިއަންކަން ހޯދި އެވެ. އަދި ހަތަރު ފަހަރު އިޓާލިއަން ކަޕް ހޯދައި، ޗެމްޕިއަންސް ލީގު ފައިނަލް ދެ ފަހަރު ކުޅުނެވެ.
ޔުވެންޓަސް، 2019 ވަނަ އަހަރު ދޫކޮށްލައި، ދެ ސީޒަނުގައި މަސައްކަތް ނުކޮށް ހުރުމަށް ފަހު، އެނބުރި އައީ ޔުވެންޓަސް އަށެވެ. މިދިޔަ ތިން އަހަރު ތެރޭ، ޔުވެންޓަސް އަށް ހޯދުނު ހަމައެކަނި ތަށްޓަކީ، މި ސީޒަނުގެ އިޓާލިއަން ކަޕް އެވެ.
