އަމްސްޓެޑަމް، ނެދަލެންޑްސް (މެއި 17) - ކުޑަހުޅަށް ލިބުނު އަނިޔާއަކަށް ފަރުވާ ހޯދަމުން އަންނަ ނެދަލެންޑްސްގެ މިޑްފީލްޑަރު، ފްރޭންކީ ޑި ޔޯން، އަށް ގައުމުން ޔޫރޯ ފުޓްބޯޅަ މުބާރާތަށް ނެގި 30 ކުޅުންތެރިންގެ ޕްރިލިމިނަރީ ސްކޮޑުން ފުރުސަތު ދީފި އެވެ.
ބާސެލޯނާ އަށް ކުޅެނިކޮށް، ޑި ޔޯންގެ ކުޑަހުޅަށް ލިބުނު އަނިޔާއާ ހެދި އޭނާ ކުުޅުމާ ދުރުގައި ހުންނަތާ މިހާރު ވަނީ މަހެއްހާ ދުވަސް ވެފަ އެވެ. އެކަމަކު، އެ ކަމަށް ބެލުމެއް ނެތި، ޑި ޔޯންގެ ފިޓްނަސް ރަނގަޅުކަން ސާބިތުކޮށްދޭން، ނެދަލެންޑްސްގެ ކޯޗު، ރޮނާލްޑް ކޫމަން މި ވަނީ ފުރުސަތެއް ދީފަ އެވެ.
ކޫމަންގެ މި ނިންމުމަށް އަންނަނީ ފާޑުކިޔުން އަމާޒުވަމުންނެވެ. އެއީ، އަނިޔާއިން ރިކަވާވެ، މެޗު ފިޓްނަސް ރަނގަޅު ކުރަން މަސައްކަތް ކުރަމުން އަންނަ އާސެނަލްގެ ފުބްލެކް ޔޫރިއަން ޓިމްބާ އަށް ފުރުސަތު ނުދިނުމުންނެވެ.
ލިވަޕޫލްގެ ވާޖިލް ވެން ޑައިކް އާއި ކޯޑީ ގަކްޕޯ އަދި ރަޔާން ގްރަވެންބާކް އަށް ވެސް ވަނީ ސްކޮޑުން ފުރުސަތު ދީފަ އެވެ. އަދި ކުރިން ލިވަޕޫލާއި ޕީއެސްޖީ އަށް ކުޅުނު ޖިއޮޖީނިއޯ ވައިނަލްޑަމް ވެސް ވަނީ ސްކޮޑުގައި ހިމަނައިފަ އެވެ. ސައުދީ އަރަބިއްޔާގެ އަލް އިއްތިފާގަށް ކުޅެމުން އަންނަ ވައިނަލްޑަމް އަށް މިދިޔަ މާޗް މަހު ސްކޮޑުން ފުރުސަތު ދިނީ، ނުވަ މަސް ދުވަހަށް ފަހު އެވެ.
ނެދަލެންޑްސް އިން ސްކޮޑު، 26 ކުޅުންތެރިންނަށް ކުޑަކުރާނީ މި މަހުގެ 29 ވަނަ ދުވަހު އެވެ. ޔޫރޯގެ ކުރިން ނެދަލެންޑްސް އިން ދެ މެޗެއް ކުޅޭނެ އެވެ. އެއީ، އައިސްލެންޑާއި ކެނަޑާއާ ދެކޮޅަށެވެ.
ޖަރުމަނުގައި ކުރިއަށްދާ ޔޫރޯގައި ނެދަލެންޑްސް އޮތީ، ޕޮލެންޑާއި ފްރާންސާއި އޮސްޓްރިއާއާ އެކު، ގްރޫޕް ޑީގަ އެވެ.
