މި މަހު 28 ގައި ހުވާކުރާ 20 ވަނަ ރައްޔިތުންގެ މަޖިލީހުގެ ތިނަދޫ ދެކުނު ދާއިރާއަށް އަމިއްލަ ގޮތުން ވާދަކުރައްވައި އިންތިހާބުވި، މުހައްމަދު އަލްސަން އަހުމަދު އާ ރައީސް ޑރ. މުހައްމަދު މުއިއްޒު ބައްދަލުކުރައްވައިފި އެވެ.
ރަސްމީ އެކްސް އެކައުންޓުން ކުރެއްވި ޕޯސްޓެއްގައި އަލްސަން ވިދާޅުވީ، ރައީސް އާ ބައްދަލުކޮށް ވާހަކަދެއްކެވީ ތިނަދޫގެ ތަރައްގީއާ ގުޅޭގޮތުން ކަމަށެވެ.
"ތިނަދޫއަށް އަދަށް ވުރެން ފަހި މާދަމާއެއް ހޯދުމަށް ރައްޔިތުން އަޅުގަނޑަށް ކުރެއްވި އިތުބާރު ނަގަހައްޓައި، ރައްޔިތުން އެދޭ ބަދަލު ދާއިރާއަށް ގެނައުމަށްޓަކައި އަޅުގަނޑުގެ ފުރިހަމަ އެއްބާރުލުން ލިބޭނެކަން އަޅުގަނޑު ވާނީ ފާހަގަކޮށްފައި،" އަލްސަން އިތުރަށް ލިޔުއްވާފައިވެ އެވެ.
އަލްސަން އަކީ 20 ވަނަ ރައްޔިތުންގެ މަޖިލީހަށް ހޮވުނު އެންމެ ޒުވާން މެންބަރަށެވެ.
ކުރިއަށް އޮތް ދައުރަށް ހޮވުނު މަޖިލީހުގެ ފުރިހަމަ މެޖޯރިޓީ ހޯދާފައިވަނީ ސަރުކާރުންނެވެ. އެގޮތުން ސަރުކާރު ހިންގާ ޕީއެންސީއާއި އެކުގައި މަސައްކަތް ކުރާ ޕާޓީތަކުގެ މެންބަރުންގެ ޖުމްލަ އަދަދު 76 އާ ހަމައަށް އަރަ އެވެ.
ނިމިދިޔަ 19 ވަނަ މަޖިލީހުގެ ސުޕަ މެޖޯރިޓީ އޮތް އެމްޑީޕީއަށް މިފަހަރުގެ އިންތިހާބުގައި، ޖުމްލަ 93 ގޮނޑީގެ ތެރެއިން ކާމިޔާބު ކުރެވުނީ އެންމެ 12 ގޮނޑި އެވެ.
