ލަންޑަން (މެއި 16) - އިނގިރޭސި ޕްރިމިއާ ލީގުގެ އެއް ސީޒަނެއްގައި އެންމެ ގިނަ ރީނދޫ ކާޑު ލިބުނު ޓީމުގެ ރެކޯޑް ޗެލްސީ އަށް ލިބިއްޖެއެވެ.
މި ރެކޯޑް ޗެލްސީ އަށް ލިބުނީ ލީގުގައި ރޭ ބްރައިޓަން އަތުން މޮޅުވި މެޗުގައި ދެއްކި ރީނދޫ ކާޑުތަކާއެކު އެވެ. މެޗުގެ 77 ވަނަ މިނިޓުގައި ޗެލްސީގެ ރަހީމް ސްޓާލިން އަށް ދެއްކި ރީނދޫ ކާޑަކީ މި ސީޒަންގައި އެ ޓީމަށް ދެއްކި 102 ވަނަ ރީނދޫ ކާޑެވެ. އަދި އެ ޓީމުގެ މޮއިސެސް ކައެސޭޑޯ އަށް ވެސް ރީނދޫ ކާޑެއް ދެއްކުމުން، ރީނދޫ ކާޑުގެ ޖުމްލަ ވަނީ 103 އަށް އަރައިފަ އެވެ.
ކުރިން އެއް ސީޒަނެއްގައި އެންމެ ގިނަ ރީނދޫ ކާޑު ދެއްކީ 2021/2022 ވަނަ އަހަރުގެ ސީޒަންގައި ލީޑްސް ޔުނައިޓެޑަށެވެ. އެ ސީޒަންގައި ލީޑްސް އަށް 101 ރީނދޫ ކާޑު ދެއްކިއެވެ.
މި ސީޒަންގައި ޗެލްސީން ރީނދޫ ކާޑެއް ނުހޯދައި ނިންމާލީ އެންމެ ދެ މެޗެވެ. އެ ޓީމުގެ މި ސީޒަންގައި މިހާތަނަށް ކުޅުނު 37 މެޗުގެ ތެރެއިން 30 މެޗުގައި އެ ޓީމަށް ވަނީ އެއް ރީނދޫ ކާޑަށް ވުރެ ގިނައިން ދައްކައިފައެވެ.
މި ސީޒަންގައި އެއް މެޗެއްގައި ޗެލްސީ އަށް އެންމެ ގިނައިން ރީނދޫ ކާޑު ދެއްކީ މިދިޔަ އަހަރުގެ ޑިސެމްބަރު މަހު ވުލްވްސްއާ ދެކޮޅަށް ކުޅުނު މެޗުގައެވެ. އެ މެޗުގައި ޗެލްސީ އަށް ހަ ރީނދޫ ކާޑު ދެއްކިއެވެ.
ޗެލްސީގައި އެންމެ ގިނަ ރީނދޫ ކާޑު ހޯދި ކުޅުންތެރިއަކީ ކައެސޭޑޯ އެވެ. އޭނާ ވަނީ 11 ކާޑު ހޯދައިފަ އެވެ.
އެކަމަކު ކައެސޭޑޯ އަށްވުރެ ގިނަ ރީނދޫ ކާޑު ހޯދާފައިވަނީ ފުލަމްގެ މިޑްފީލްޑަރު ޖޯ ޕާލީނިއާ އެވެ. އޭނާ ވަނީ 13 ކާޑު ހޯދައިފަ އެވެ.
