ލަންޑަން (މެއި 16) - އިނގިރޭސި ޕްރިމިއާ ލީގުގައި ރޭ ބްރައިޓަން އަތުން 2-1 އިން ކުރިހޯދައި ޗެލްސީން މޮޅުވުމުގެ ސިލްސިލާ ދެމެހެއްޓިއިރު، ނިއުކާސަލް ޔުނައިޓެޑް އަތުން 3-2 އިން މޮޅުވެ، މެންޗެސްޓާ ޔުނައިޓެޑުން ވެސް ކުރިއަށް ދިއުމުގެ އުންމީދެއް ހޯދައިފި އެެވެ.
ލީގުގައި ޖެހިޖެހިގެން ހޯދި ހަތަރު ވަނަ މޮޅާ އެކު، ޗެލްސީ އޮތީ ހަ ވަނައިގަ އެވެ. އެއީ 37 މެޗުން 60 ޕޮއިންޓް ހޯދައިގެންނެވެ. ޗެލްސީ އަށް ފަސް ވަނައިގައި ނިންމުމުގެ ފުރުސަތު ވެސް އެބައޮތެވެ. އެއީ ފަހު މެޗުން ފަސް ވަނައިގައި އޮތް ޓޮޓެންހަމް ހޮޓްސްޕާސް ބަލިވެއްޖެނަމަ އެވެ. ޓޮޓެންހަމް މި ވަގުތު އޮތީ 37 މެޗުން 63 ޕޮއިންޓާ އެކު އެވެ.
ހަތް ވަނައިގައި އޮތީ 37 މެޗުން 57 ޕޮއިންޓާ އެކު، ނިއުކާސަލް އެވެ. ޔުނައިޓެޑް އަށް ވަނައިގައި އޮތީ ހަމަ، 37 މެޗުން 57 ޕޮއިންޓް ހޯދައިގެންނެވެ.
ޔުނައިޓެޑް ދަނޑުގައި ރޭ އެ ޓީމުން ލީޑުނެގީ ފުރަތަމަ ހާފުގައި ކޯބީ މައިނޫ ޖެހި ލަނޑުންނެވެ. ދެ ވަނަ ހާފް ފަށައިގެން މާގިނައިރެއްނުވެ، އެންތަނީ ގޯޑަން، ނިއުކާސަލަށް އެއްވަރުކޮށްދިންތާ މާ ގިނައިރެއްނުވެ، އަމަދު ޑިއާލޯ ލަނޑެއް ޖަހައި، އަލުން ޔުނައިޓެޑަށް ކުރި ހޯދައިދިނެެވެ.
ނަތީޖާ ހަމަހަމަކުރަން ނިއުކާސަލްގެ ސީން ލޯންގްސްޓާފް އާއި މިގޭލް އަލްމިރޯނަށް ލިބުނު ފުރުސަތުތައް ނަގާލި ފަހުން، ބަދަލަކަށް އެރި ޔުނައިޓެޑްގެ ރަސްމުސް ހޮއިލުންޑް ލަނޑު ޖަހައި، ދެ ގޯލުގެ ލީޑެއް ނަގައިދިނެވެ. މިއީ އެންމެ ފަހުން ކުޅުނު 10 މެޗުގެ ތެެރޭގައި ހޮއިލުންޑް ޖެހި ފުރަތަމަ ލަނޑެވެ.
ޔުނައިޓެޑްގެ ލަނޑު ޖެހި ހޮއިލުންޑަށް ފުރުސަތު ތަަނަވަސްކޮށްދިން ފެނާންޑޭސްއާ އެކު އުފާފާޅުކުރަނީ.
އިތުރު ވަގުތުގައި ނިއުކާސަލްގެ ލެވިސް ހޯލް ލަނޑެއް ޖަހައި، ފަރަގު ކުޑަކުރި ނަމަވެސް، އިތުރު ގޯލެއް ޖަހައި، އެއްވަރުކުރަން ވަގުތެއް ނުލިބުނެވެ.
ބްރައިޓަން ދަނޑުގައި ޗެލްސީން ލީޑުނެގީ، ފުރަތަމަ ހާފުގައި ކޯލް ޕާމާ ބޮލުން ޖެހި ގޯލުންނެވެ. މިއީ މި ފަހަރު ލީގުގައި ޕާމާ ޖެހި 22 ވަނަ ލަނޑެވެ.
ދެ ވަނަ ހާފުގައި ކްރިސްޓޮފާ އެންކުންކޫ ވަނީ ލަނޑެއް ޖަހައި ޗެލްސީ އަށް ދެ ގޯލުގެ ލީޑެއް ނަގައިދީފަ އެވެ.
ޗެލްސީން ދެ ގޯލު ކުރީގައި އޮއްވައި، އެ ޓީމުގެ ކެޕްޓަން، ރީސް ޖޭމްސް ކުރި ފައުލަކަށް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ރަތް ކާޑެއް ދެއްކި އެވެ. މިއީ މި ސީޒަނުގައި ޖޭމްސް ހޯދި ދެ ވަނަ ރަތް ކާޑެވެ. ޗެލްސީގެ އެއް ކުޅުންތެރިއަކު މަދުވުމުގެ ފައިދާނަގައި، ބްރައިޓަންގެ ޑެނީ ވެލްބެކް ވަނީ ލަނޑެއް ޖަހައިފަ އެވެ.
