ދަރުމަވަންތަ ހޮސްޕިޓަލުގައި މިހާރު ހިންގަމުންދާ މޯލްޑިވްސް ނެޝަނަލް ޔުނިވާސީޓީ (އެމްއެންޔޫ)ގެ މެޑިކަލް ސްކޫލުގެ އާ އިމާރާތެއް އެޅުމަށް ކޮންޓްރެކްޓަރެއް ހޯދުމަށް ޝައުގުވެރިކަން ފާޅުކުރުމުގެ ފުރުސަތު އެ ޔުނިވާސިޓީން ހުޅުވާލައިފި އެވެ.
ގެޒެޓުގައި އިއްޔެ ކުރި އިއުލާނެއްގައި އެ ޔުނިވާސިޓީން ވަނީ އެ މަސައްކަތް ކުރުމަށް ގާބިލުކަން ހުރި ރާއްޖެ އަދި ބޭރުގެ ކޮންޓްރެކްޓަރުންނަށް ޖޫން 27, ގެ ކުރިން ޝައުގުވެރިކަން ފާޅުކުރުމަށް ހުޅުވާލައިފަ އެވެ. މިކަމާ ގުޅޭ މައުލޫމާތު ބައްދަލުވުމެއް މެއި 27, ގައި ބާއްވާނެ އެވެ.
އެ އިއުލާނުގައިވާ ގޮތުން މިއީ ރާއްޖެ އާއި ދެކުނު އޭޝިއާގައި ސިއްހީ ދާއިރާއިން ތައުލީމާއި ތަމްރީނު ހޯދުމަށް އިތުރުވަމުންދާ ޑިމާންޑަށް ހިދުމަތް ދެވޭ ގޮތަށް ޓީޗިން ހޮސްޕިޓަލަކާ އެކު ތަރައްގީކުރާ މެޑިކަލް ސްކޫލެކެވެ.
މި ޕްރޮޖެކްޓުގެ ދަށުން, ކިޔަވައިދޭ ތަންތަނާއި, ސެމިނާ ރޫމްތަކާއި, އޮޑިޓޯރިއަމަކާއި, ލެބޯޓަރީ އަދި ސްކޫލަށް ބޭނުންވާ ހުރިހާ ވަސީލަތެއް ގާއިމުކުރާނެ އެވެ.
ކޮންމެ އިންޓޭކެއްގައި 100 ދަރިވަރުންނަށް ފުރުސަތު ދެވޭނެ ކަމަށާއި އަދި ފުލް ކެޕޭސިޓީގައި 500 ދަރިވަރުންނަށް އެއްފަހަރާ ކިޔަވައިދެވޭނެ ފެންވަރަށް މި ސްކޫލް ތަރައްގީކުރާނެ އެވެ.
މި ސްކޫލާއި ޓީޗިން ހޮސްޕިޓަލުގެ ޑިޒައިންކޮށް ކުރަހާނީ އެމްއެންޔޫއިންްނެވެ. މި ސްކޫލް އަޅާނީ 61,000 އަކަފޫޓަށް ވުރެ ބޮޑު ކޮށްޓެއްގަ އެވެ.
މެޑިކަލް ސްކޫލް ދަރުމަވަންތަ ހޮސްޕިޓަލުން، އެ ޔުނިވާސިޓީގެ މައި ކެމްޕަހަށް ބަދަލު ކުރަން ދާދިފަހުން ސަރުކާރުން ނިންމި އެވެ. ނަމަވެސް, އެކަމާ ދެކޮޅަށް ދަރިވަރުން އަޑުއުފުލުމުން އެ ނިންމުން ވަނީ އަނބުރާ ގެންގޮސްފަ އެވެ.
ޕާކިސްތާން ސަރުކާރުގެ ހިލޭ އެހީގެ ދަށުން ޓިޗިން ހޮސްޕިޓަލެއް އެޅުމަށް ފެބްރުއަރީ 8, ގައި އެއްބަސްވުމެއްގައި ވެސް ސޮއިކުރި އެވެ. ބެލެވޭ ގޮތުގައި މި ހޮސްޕިޓަލް އަޅާނީ އެ ގައުމުގެ އެހީގެ ދަށުންނެވެ.
ސްކޫލް އޮފް މެޑިސިން 2018 ވަނަ އަހަރު ގާއިމުކޮށް، ދަރުމަވަންތަ ހަސްފަތާލުގެ ދެ ފަންގިފިލާއެއް އެމްއެންޔޫއަށް އަށް ދޫކޮށްފައިވަނީ ސްކޫލް އޮފް މެޑިސިން ހިންގަން ޓީޗިން ހޮސްޕިޓަލެއް އިމާރާތްކޮށް ނިމެންދެކަށެވެ.
