ފޮރިން މިނިސްޓަރު މޫސާ ޒަމީރު, ގަތަރަށް ކުރެއްވި ރަސްމީ ދަތުރު ނިންމާލައިފި އެވެ.
ރާއްޖެ އާއި ގަތަރާ ދެމެދު އޮތް ގުޅުން އިތުރަށް ބަދަހި ކުރުމަށް މިނިސްޓަރު ޒަމީރު ގަތަރަށް ވަޑައިގެންނެވީ މިިދިޔަ ހޮނިހިރު ދުވަހެވެ.
ޒަމީރުގެ ދަތުރުގައި ގަތަރުގެ ބޮޑުވަޒީރު އަދި މިނިސްޓާ އޮފް ފޮރިން އެފެއާޒް މުހައްމަދު ބިން އަބްދުއްރަހްމާން އަލްތާނީގެ އަރިހަށް އިހްތިރާމްގެ ޒިޔާރަތެއް ކުރެއްވި އެވެ. އެ ޒިޔާރަތުގައި, ދެ ގައުމުގެ ދެމެދުގައި މިހާރު އޮތް ގުޅުން އިތުރަށް ގުޅުން ބަދަހިކުރެވޭނެ ގޮތްތަކާ ބެހޭ ގޮތުން މަޝްވަރާ ކުރެއްވި އެވެ.
ޒަމީރާއެކު ރާއްޖޭގެ ހާރިޖީ އޮފީހުގެ އިސް ވަފުދެއް ގަތަރަށް ވަޑައިގަތެވެ. އޭގެ ތެރޭގައި ބައިލެޓެރަލް ސެކްރެޓަރީ ޑރ. ހާލާ ހަމީދާއި އެމްބެސަޑާ އެޓް ލާޖް ޑރ. ފަޒީލް ނަޖީބާއި އެސިސްޓެންޑް ޑިރެކްޓަރު ލަމްހާ ސަލީމް ހިމެނިވަޑައިގަންނަވަ އެވެ.
މިއީ ކުރީގެ ރައީސް އަބްދުﷲ ޔާމީންގެ ވެރިކަމުގައި ރާއްޖެއިން ގަތަރާއެކު އޮތް ޑިޕްލޮމެޓިކް ގުޅުން ކަނޑާލުމަށްފަހު، އެ ގުޅުން ގާއިމް ކުރި ފަހުން ރާއްޖޭގެ މިހާ އިސް ވަފުދެއް އެ ގައުމަށް ވަޑައިގެންނެވި ދެ ވަނަ ފަހަރެވެ.
ރާއްޖެއިން ގަތަރާއެކު އޮތް ގުޅުން ކަނޑާލީ ޖޫން، 2017، ގަ އެވެ. ރާއްޖެއިން ގަތަރާއެކު އޮތް ގުޅުން ކަނޑާލީ ސައުދީ ސަރުކާރުން ގަތަރާއެކު ޑިޕްލޮމެޓިކް ގުޅުން ކަނޑާލުމަށްފަހު އެ ގައުމުން ކުރިމަތި ކުރުވި ޕްރެޝަރުތަކަށްފަހެވެ.
ރާއްޖެއިން އަލުން ގަތަރާއެކު ގުޅުން ގާއިމް ކުރީ މާޗް، 2021، ގައި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގަ އެވެ. އެއިރު ސައުދީ އާއި ގަތަރާ ޖެހުނު މައްސަލަ ފިނިވެ، އެ ދެ ގައުމުން ވެސް އޮތީ ގުޅުން ގާއިމުކޮށްފަ އެވެ.
