ކީލިއަން އެމްބާޕޭ އަށް ހާއްސަވި މެޗުން ޕީއެސްޖީ ބަލިވެއްޖެ އެވެ.
އަމިއްލަ ދަނޑުގައި ޕީއެސްޖީ އިން ކުޅުން މެޗުން ޓޮލޯސާ އަތުން ބަލިވީ 3-1 ގެ ނަތީޖާ އަކުންނެވެ. މިއީ ޕީއެސްޖީގެ ތަރި ކީލިއަން އެމްބާޕޭ އަމިއްލަ ދަނޑުގައި ޕީއެސްޖީ އަށް ކުޅެދިން ފަހު މެޗެވެ. މި ސީޒަން ނިމުމުން ޕީއެސްޖީ ދޫކޮށްލާނެ ކަން އެމްބާޕޭ ވަނީ ހާމަކޮށްފަ އެވެ.
މި މެޗުގެ އަށްވަނަ މިނެޓުގައި ޕީއެސްޖީ އިން ވަނީ ގޯލު ޖަހާ ލީޑު ނަގައިފަ އެވެ. މި ގޯލު އެ ޓީމަށް ޖަހައި ދިނީ އެމްބާޕޭ އެވެ. މިއީ މި ސީޒަނުގައި އެމްބާޕޭ ޕީއެސްޖީ އަށް ޖަހައިދިން 44 ވަނަ ގޯލެވެ.
އެކަމަކު ފުރަތަމަ ހާފު ނިމުމުގެ ކުރިން ޓީސް ޑަލިންގާ ވަނީ ގޯލު ޖަހައި ޓޮލޯސާ އަށް ނަތީޖާ ހަމަހަމަ ކޮށްދީފަ އެވެ.
މެޗުގެ ދެވަނަ ހާފުގައި ޕީއެސްޖީ އިން އެ ޓީމުގެ އެޓޭކުތައް ވަރުގަދަކޮށް ޓޮލޯސާގެ ހާފަށް ބާރު ބޮޑުކުރިއިރު, މި ހާފުގައި ޕީއެސްޖީ އިން ވަނީ ގިނަ ބަދަލުތަކެއް ގެނަސްފަ އެވެ. އެގޮތުން އޮސްމާން ޑެމްބަލޭ, އާއި އަޝްރަފް ހަކީމް ވެސް މި ހާފުގައި އެ ޓީމުން ވަނީ ކުޅެން އަރުވާފަ އެވެ. އެކަމަކު މެޗުގެ 68 ވަނަ މިނެޓުގައި ޔަން ގިބޮހޮވް ހިތްގައިމު ގޯލެއް ޖަހައި ޓޮލޯސާ އަށް ލީޑު ނަގައިދީފަ އެވެ. އަދި މެޗު ނިމުމުގެ ކުރިން ޓޮލޯސާގެ ތިންވަނަ ގޯލު އެ ޓީމަށް ޖަހާދިނީ ފްރޭންކް މާގްރީ އެވެ.
މި މެޗަށް ނުކުތްއިރު, ވެސް ޕީއެސްޖީ އިން ވަނީ ފްރެންޗް ލީގު ކާމިޔާބު ކޮށްފަ އެވެ. އެ ޓީމަށް 32 މެޗުން 70 ޕޮއިންޓް ވަނީ ލިބިފަ އެވެ.
