އިންޑިއާގެ ބޮޑުވަޒީރު ނަރެންދުރަ މޯދީގެ ހުދުމުހުތާރުކަމާ ދެކޮޅަށް ތެދުވަން ދިއްލީގެ ސީއެމް އަދި އާމް އާދްމީ ޕާޓީގެ ލީޑަރު އަރްވިންދު ކެޖްރިވާލް ގޮވާލައިފި އެވެ.
ކޮރަޕްޝަންގެ ތުހުމަތުގައި ހައްޔަރުކުރުމަށްފަހު، ކަފާލާތުގެ ދަށުން ދޫކޮށްލުމާއެކު ދިން ފުރަތަމަ ނޫސްވެރިންގެ ބައްދަލުވުމުގައި ކެޖްރިވާލް ވިދާޅުވީ މޯދީ އަންނަނީ ހުރިހާ އިދިކޮޅު ލީޑަރުން ނައްތާލަން މަސައްކަތް ކުރަމުން ކަމަށާއި، އެ ހުދުމުހުތާރުކަމާ ދެކޮޅަށް މުޅި ގައުމު ތެދުވަން ޖެހޭ ކަމަށެވެ.
ކޮރަޕްޝަނާ ދެކޮޅަށް މަސައްކަތް ކުރައްވާ ކަމަށް މޯދީ ވިދާޅުވާއިރު، ހުރިހާ ވަގުން ތިބީ މޯދީ ނިސްބަތްވާ ޕާޓީގައި ކަމަށް ވެސް އަރްވިންދު ތުހުމަތުކުރެެއްވި އެވެ.
ކޮރަޕްޝަންގެ ތުހުމަތުގައި ކެޖްރިވާލް ހައްޔަރުކުރީ މާޗު، 21 ގައި ކަމަށްވާއިރު، އޭނާ ކަފާލާތުގެ ދަށުން ދޫކޮށްލީ މަހެއް ފަހުން އިންތިހާބުގެ ކެމްޕޭނަށެވެ.
މިގޮތުން ޖޫން، 2 ގައި އަނބުރާ ފުލުހުންނާ ހަވާލުވުމަށް ކެޖްރިވާލްއަށް ވަނީ ޝަރުތުކޮށްފަ އެވެ. ނަމަވެސް ދޫކޮށްލާފައި ހުންނަ މުއްދަތުގައި އޭނާއަށް ވަޒީފާގެ މަސްއޫލިއްޔަތު އަދާ ކުރުމުގެ ހުއްދައެއް ނުދެ އެވެ.
ކެޖްރިވާލް ހައްޔަރުކުރީ ދިއްލީގެ ލިކާ ޕޮލިސީއާ ގުޅޭ ކޮރަޕްޝަންގެ ތުހުމަތުގަ އެވެ. ނަމަވެސް އޭނާ ވަނީ އެ ތުހުމަތުތައް ދޮގުކޮށް، ކުރަނީ ސިޔާސީ ގޮތުން ކުރާ ތުހުމަތުތަކެއް ކަމަށް ބުނެފަ އެވެ.
