އިންޑިއާގެ އެހީގައި އެމްއެންޑީއެފް ކޯސްޓްގާޑުގެ ބަނދަރު ގާއިމުކުރާ އުތުރުތިލަފަޅުގައި އިންޑިއާގެ އަސްކަރިއްޔާ މީހަކު ނެތް ކަމަށް ސަރުކާރުން ބުނެފި އެވެ.
ރާއްޖޭގައި އިންޑިއާ ސިފައިން ތިބި ކަމަށް މީގެ ކުރިން ބުނެފައި ވަނީ, ހަނިމާދޫ, ކައްދޫ, ގަން އަދި އުތުރުތިލަފަޅުގެ އިތުރުން, ސެނަހިޔާ ހޮސްޕިޓަލުގަ އެވެ. އޭގެ ތެރެއިން ހަނިމާދޫ, ކައްދޫ އަދި ގަމުގައި ތިބި ޖުމްލަ 76 ސިފައިން މިހާރު ވަނީ އަނބުރާ ފޮނުވާލާފަ އެވެ.
ސެނަހިޔާ ހޮސްޕިޓަލުގައި ތިބި އަސްކަރީ ޑޮކްޓަރުންނާއި, އުތުރުތިލަފަޅުގައި ތިބި ސިފައިންނާ ބެހޭ ގޮތުން ސުވާލު ކުރުމުން ޑިފެންސް މިނިސްޓަރު ޣައްސާން މައުމޫނު ވިދާޅުވީ, ރާއްޖޭގައި ތިބި އިންޑިއާގެ އަސްކަރީ ޑޮކްޓަރުން ފޮނުވާލުމުގެ ވިސްނުމެއް ނެތް ކަމަށާއި, އުތުރުތިލަފަޅުގައި އަސްކަރީ ބަޔަކު ނެތް ކަމަށެވެ.
"އަޅުގަނޑުމެންގެ މައުލޫމާތުތަކުން ދައްކާ ގޮތުން އުތުރުތިލަފަޅުގައި އަސްކަރީ މީހަކު ނެތް،" ޣައްސާން ވިދާޅުވި އެވެ.
އުތުރުތިލަފަޅުގައި ބަނދަރާއި ޑޮކްޔާޑު ހެދުމުގެ މަޝްރޫއު ފެށީ މި ހިނގާ މެއި 3، އެވެ. އެ މަޝްރޫއު ފައްޓަވައިދެއްވީ، އިންޑިއާގެ ޑިފެންސް މިނިސްޓަރު ރާޖްނާޓު ސިންގް އާއި އޭރުގެ ޑިފެންސް މިނިސްޓަރު މާރިޔާ އަހުމަދު ދީދީ އެވެ.
އެ މަޝްރޫއު 186 މިލިއަން ޑޮލަރު (2.9 ބިލިއަން ރުފިޔާ) އަށް ހަވާލުކޮށްފައި ވަނީ އިންޑިއާގެ ރެއިލްވޭ ކުންފުންޏެއް ކަމަށްވާ ރެއިލް ވިކާސް ނިގާމްއާ އެވެ.
