ޕެރިސް (މެއި 11) - ފްރާންސްގެ ފޯވާޑް، ކީލިއަން އެމްބާޕޭ، ހަތް އަހަރަށް ފަހު ޕީއެސްޖީ ދޫކޮށް އެހެން ކުލަބަކަށް ބަދަލުވާން ނިންމާފައިވާ ކަމަށް ބުނެފި އެވެ.
މި ސީޒަނަށް ފަހު އެމްބާޕޭ ޕީއެސްޖީ ދޫކޮށްލާނެ ކަމަށް ކުރިންވެސް ބެލެވުނުއިރު, އެމްބާޕޭ އޭރު ބުނެފައިވަނީ ވަގުތު ޖެހެމުން އޭނާގެ ކުރިމަގުގެ ޕްލޭން ހިއްސާކުރާނެ ކަމަށެވެ.
ރޭ ޝޯޝަލް މީޑިއާ އަށް ދޫކޮށްލި ވީޑިއޯގައި އެމްބާޕޭ ބުނީ, އޭނާ އަންނަ ސީޒަނުގައި ޕީއެސްޖީ އިން ނުފެންނާނެ ކަމަށެވެ.
"އަހަރެން ހަތް އަހަރަށްފަހު އުފަން ގައުމު ޕްރާންސް ދޫކޮށް, ލީގު ވަން ދޫކޮށް, ޕީއެސްޖީ ދޫކޮށްލަން ނިންމާފިން. މިއީ ފަސޭހަ ނިންމުމެއް ނޫން." އެމްބާޕޭ ބުންޏެވެ.
އެމްބާޕޭ ބުނީ, ޕީއެސްޖީއާ އެކު ހޭދަކުރި ހަތް އަހަރުގެ ތެރޭގައި ވަރަށް ބައިވަރު ކަންކަން ދަސްވި ކަމަށާއި, ހާއްސަކޮށް ކުޅުންތެރިއެއްގެ ގޮތުގައި ފުރިހަމަ ވުމަށް ޕީއެސްޖީ އިން ދަސްވި ކަމަށެވެ.
"ޕީއެސްޖީ އަކީ ފްރާންސްގެ އެންމެ މޮޅު ޓީމު. އަދި ދުނިޔޭގެވެސް މޮޅެތި ޓީމުތަކުގެ ތެރޭގައި ހިމެނޭ ޓީމެއް. މި ތަނުން އަހަރެން ބައިވަރު މީހުންނާ ދިމާވެއްޖެ. ދުނިޔޭގެ ނަން މަޝްހޫރު އެތައް ކުޅުންތެރިންނާއެކު ކުޅެވިއްޖެ. އެ ކުޅުންތެރިންގެ ފަރާތުން އަހަރެން އިތުރަށް ބިލްޑްއަޕްވާން ދަސްކޮށްދިން. ޕީއެސްޖީގައި ހޭދަކުރި ދުވަސްތައް އަބަދުވެސް ހާއްސަވާނެ. އަހަރެން އެހެން ކުލަބަކަށް ބަދަލުވިޔަސް ޕީއެސްޖީގެ މެޗުތައް ބަލާ ސަޕޯޓްކުރާނަން" އެމްބާޕޭ ބުންޏެވެ.
ޕީއެސްޖީ ދޫކޮށް އެމްބާޕޭ އެހެން ކުލަބަކަށް ބަދަލުވާނެކަން އޭނާ ހާމަކޮށްފައިވާއިރު, އޭނާ ދާނެ ކަމަށް ބެލެވެނީ ސްޕެއިންގެ ޗެމްޕިއަން ރެއާލް މެޑްރިޑް އަށެވެ. ރެއާލުން ވަނީ މިދިޔަ ތިން ސީޒަނުގައިވެސް އެމްބާޕޭ ހޯދަން މަސައްކަތް ކޮށްފަ އެވެ. އެކަމަކު އެއިން ކޮންމެ ފަހަރަކު އެމްބާޕޭ ވަނީ ރެއާލުގެ ހުށަހެޅުމަށް ނޫނެކޭ ބުނެފަ އެވެ.
އެމްބާޕޭ ޕީއެސްޖީ ދޫކޮށްލާނެކަން ހާމަކޮށްފައިވާއިރު, އޭނާ އެހެން ކުލަބަކަށް ބަދަލުވާނަމަ ދެން އެއްވެސް ކުލަބަކަށް އޭނާ ހޯދުމަށް ބިޑް ކުރާކަށް ނުޖެހޭނެ އެވެ. އެއީ އެމްބާޕޭ ޕީއެސްޖީ އާއެކު ހަދާފައިވާ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ.
އެމްބާޕޭ ޕީއެސްޖީ އަށް ކުޅެދިން 306 މެޗުގައި އޭނާ ވަނީ 255 ގޯލު ޖަހާ 96 ގޯލު ޖަހަން އެހީތެރިވެދީފަ އެވެ. އަދި ޕީއެސްޖީ އާއެކު ހަތް ފަހަރު ފްރެންޗް ލީގު ވަނީ ކާމިޔާބު ކޮށްފަ އެވެ.
