ކޮރަޕްޝަންގެ ތުހުމަތުގައި ހައްޔަރުކުރި އިންޑިއާގެ ދިއްލީގެ ޗީފް މިނިސްޓަރު އަރްވިންދު ކެޖްރިވާލް ކަފާލާތުގެ ދަށުން ދޫކޮށްލައިފި އެވެ.
އިންޑިއާގެ އިދިކޮޅު ލީޑަރުން ތެރޭގައި ހިމެނޭ ކެޖްރިވާލް މަހަކަށްވުރެ ގިނަ ދުވަސް ވަންދެން ބަންދުގައި ބެހެއްޓުމަށްފަހު ދޫކޮށްލާފައި ވަނީ ޖޫން، 2 ގައި އަނބުރާ ފުލުހުންނާ ހަވާލުވުމަށް ޝަރުތު ކުރުމަށްފަހު އެވެ.
ކެޖްރިވާލް ހައްޔަރުކުރީ ދިއްލީގެ ލިކާ ޕޮލިސީއާ ގުޅޭ ކޮރަޕްޝަންގެ ތުހުމަތުގަ އެވެ. ނަމަވެސް އޭނާ ވަނީ އެ ތުހުމަތުތައް ދޮގުކޮށް، ކުރަނީ ސިޔާސީ ގޮތުން ކުރާ ތުހުމަތުތަކެއް ކަމަށް ބުނެފަ އެވެ.
ކެޖްރިވާލް ދޫކޮށްލާފައި ވަނީ ޗީފް މިނިސްޓަރުގެ މަސްއޫލިޔަތުތައް އަދާ ނުކުރެވޭ ގޮތަށެވެ. ނަމަވެސް މިހާރު ހިނގަމުންދާ އާންމު އިންތިހާބުގެ ކެމްޕޭނުގައި ބައިވެރިވުމުގެ ފުރުސަތު ވަނީ އެންމެ މަތީ ކޯޓުން އޭނާ އަށް ދީފަ އެވެ.
މާޗު 21 ގައި ހައްޔަރުކުރި ކެޖްރިވާލްއަކީ އިންޑިއާގެ އާމް އާދްމީ ޕާޓީގެ ލީޑަރެވެ. އޭނާ ހައްޔަރުކުރީ އިންތިހާބުން ރަނގަޅު ނަތީޖާއެއް ހޯދާނެތީ އެކަމަށް ހުރަސް އެޅުމަށް ކަމަށް އިދިކޮޅުން ބުނެ އެވެ.
އިންޑިއާގެ އާންމު އިންތިހާބުގެ ވޯޓުލުން ކުރިއަށްދާއިރު، މިހާތަނަށް ތިން ފޭހެއްގެ ވޯޓުލުން ވަނީ ނިމިފަ އެވެ. އިންތިހާބުގެ ވޯޓުލުން ހަތް ފޭހަކަށް ކުރިއަށްދާއިރު، ވޯޓުލައި ނިމޭނީ ޖޫން، 1 ގަ އެވެ. އަދި ނަތީޖާ އިއުލާން ކުރާނީ ޖޫން، 4 ގަ އެވެ.
