ލަންޑަން (އޭޕްރީލް 2) - އިނގިރޭސި ޕްރިމިއާ ލީގުގައި އިންސާފުކުރާ ރެފްރީންގެ ފެންވަރު މި ސީޒަނުގައި ވަރަށް ދަށް ކަމަށް ބާންލީގެ ކޯޗު ވިންސެންޓް ކޮމްޕެނީ ބުނެފި އެވެ.
ލީގުގައި އެންމެ ފަހުން، ބާންލީން ކުޅުނު މެޗުގައި 2-2 އިން ޗެލްސީއާ އެއްވަރުވިއިރު، އެ މެޗުގައި ކޮމްޕެނީ އަށް ވަނީ ފުރަތަމަ ހާފުގައި ރަތް ކާޑު ދައްކައިފަ އެވެ. އެއީ، މެޗުގެ ރެފްރީ، ޗެލްސީ އަށް ޕެނަލްޓީއެއް ދޭން ނިންމިއިރު، ބާންލީ ކުޅުންތެރިއަކަށް ރަތް ކާޑު ދެއްކުމުން، އެ ކަމާ ކޮމްޕެނީ ހިތްހަމަނުޖެހުން ފާޅުކުރި ގޮތުންނެވެ.
މި ސީޒަނުގައި މިހާތަނަށް ބާންލީގެ ހަ ކުޅުންތެރިއަކަށް ރަތް ކާޑު ދައްކާފައިވާއިރު، އެންމެ ގިނައިން ރަތް ކާޑު ދެއްކީ ވެސް އެ ޓީމުގެ ކުޅުންތެރިންނަށެވެ.
މެންޗެސްޓާ ސިޓީގެ ކުރީގެ ކެޕްޓަން، ކޮމްޕެނީ ބުނީ، ރެފްރީންގެ ކަންކަމާ ގުޅޭގޮތުން އޭނާ މީޑިއާގައި ވާހަކަ ދައްކައި، ފާޑުކިޔަނީ އެކަމާ ގުޅޭ ގޮތުން އަދަބު ލިބޭނެކަން އެނގިހުރެ ކަމަށެވެ.
"ލަދުން ވެސް ނުހުންނާނަން، ބިރުން ފަހަތަކަށް ވެސް ނުޖެހޭނަން. އަހަރެން ދެކޭގޮތް ހާމަކުރާނަން. ރެފްރީންގެ އިންސާފުކުރުމުގެ ފެންވަރު މި ސީޒަނުގައި ފެންނަނީ ވަރަށް ދަށްކޮށް. މިއީ އަހަންނަށް ގަބޫލުކުރެވޭ ގޮތް،" ލީގުގެ 19 ވަނައިގައި އޮތް ބާންލީއާ ހަވާލުވެހުރި ކޮމްޕެނީ ބުންޏެވެ.
ކޮމްޕެނީ ބުނީ މީގެ އެންމެ ބޮޑު މައްސަލަ އަކީ ވީޑިއޯ އެސިސްޓަންޓް ރެފްރީ (ވީއޭއާރް) އައުމާ އެކު، ރެފްރީންނަށް ފަސޭހަވާނެކަމަށް ގަބޫލުކުރެވުނުއިރު، އޭގެ ފަހުން ވެސް ކަންކަން ރަނގަޅު މަގުން ނުދާތީ ކަމަށެވެ. އަދި ވީއޭއާރް ބޭނުންކުރުމުގައި، އެކި ފަހަރު އެކި ރެފްރީން އަމަލުކުރާ ގޮތް ތަފާތުކަން ވެސް ކޮމްޕެނީ ވަނީ ފާހަގަކޮށްފަ އެވެ.
