ދިވެހިރާއްޖެއިން ގަތް ބޭރަކްތާރު ޓީބީ-2 ޑްރޯންއެއްގެ އަގަކީ އެންމެ ދެ މިލިއަން ޑޮލަރު ކަމަށާއި އެ ޑްރޯންތައް ގަތް އަސްލު އަގު ސަރުކާރުން ހާމަ ކުރަންޖެހޭ ކަމަށް އިދިކޮޅު ޕާޓީ އެމްޑީޕީން މިރޭ ބުނެފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެ ޕާޓީގެ ތަރުޖަމާނު އަހުމަދު އީސާ ވިދާޅުވީ ރާއްޖެއިން ތިން ދެ ޑްރޯން ގަތުމަށް 39 މިލިއަން ޑޮލަރު ހަރަދުކޮށްފައިވާ ކަމަށާއި އެއީ ބޮޑު ކޮރަޕްޝަނެއް ކަމަށެވެ. ކުވެއިތުން ޑްރޯން ގަތް އަގު މީޑިއާއަށް ހާމަކޮށްފައިވާ ކަމަށް ވެސް އީސާ ވިދާޅުވި އެވެ.
"އެ އާޓިކަލްގައި ވަރަށް ސާފުކޮށް އެބަ އޮތް އޭގެން ޑްރޯނެއް ކުވައިތަށް ގަތް އަގަކީ ދެ މިލިއަން ޑޮލަރޭ. ހަމަ އެއް ބްރޭންޑެއް، އެއް ފީޗާތަކެއްގެ ޑްރޯން، އެއް ކުންފުންޏަކުން، އެއް ގައުމަކުން. ކުވައިތަށް ދެ މިލިއަން ޑޮލަރަށް ޑްރޯނެއް ގަތީ ދިވެހިރާއްޖެއަށް 39 މިލިއަން ޑޮލަރަށް ދެ ޑްރޯން،" އީސާ ވިދާޅުވި އެވެ.
ތުރުކީއިން ދިވެހިރާއްޖެއަށް ގެނައީ ތިން ޑްރޯން ކަމަށްވެ އެވެ. އޭގެ ތެރެއިން ޑްރޯންއެއް ހިލޭ ލިބިފައިވާ ފަދަ މޭރުމަކުން ޑިފެންސް މިނިސްޓަރު ގައްސާން މައުމޫން ވަނީ މިއަދު މަޖިލީހުގައި ވާހަކަ ދައްކައިފަ އެވެ. ނަމަވެސް އޭގެ ތަފުސީލު ހާމަ ކުރައްވަން މިނިސްޓަރު ދެކޮޅު ހެއްދެވި އެވެ.
މިރޭގެ ޕްރެސްގައި އީސާ ގޮވާލެއްވީ ޑްރޯން ގަތުމުގެ މުއާމަލާތުގައި ކޮރަޕްޝަން ނުހިމެނޭ ނަމަ ގަތް އަގު އަވަހަށް ހާމަ ކުރުމަށެވެ.
"ކޮރަޕްޝަން ނެތް ކަމަށްވާ ނަމަ ގަތް އަގު އާންމުކޮށްދެއްވަންވީ ނޫންތޯ. ގަތް އަގު ހާމަކޮށްގެން ގައުމީ ސަލާމަތަށް ނުރައްކާވާ އެއްވެސް ސަބަބެއް އަޅުގަނޑުމެންނަކަށް ނުވިސްނޭ. ނުރައްކާވާ ނަމަ ހަމަ [އަގު ހާމަކޮށްގެން] ކުވެއިތު ސަރުކާރަށް ވެސް ނުރައްކާވީސް ނޫންތޯ،" އޭނާ ވިދާޅުވި އެވެ.
ރައްޔިތުންގެ މަޖިލީހަށް ހާޒިރު ކުރުމުން ގައްސާން މިއަދު ވިދާޅުވެފައި ވަނީ ޑްރޯންއާ ގުޅޭ ބައެއް ތަކެތި ހިލޭ ލިބިފައިވާ ކަމަށެވެ.
"އަސްކަރިއްޔާގެ ގާބިލިއްޔަތު އިތުރުކުރުމަށް މި ހޯދުނު ޔޫއޭވީތަކުގެ ދިވެހިރާއްޖޭގެ ދައުލަތުން ހަރަދުކޮށްފަ ވެސް ވާނެ، އަދި ހިލޭ ވެސް އެއްޗެހި ލިބިފަ އެބަހުރި،" ގައްސާން ވިދާޅުވި އެވެ.
އޭގެ އިތުރުން ގައްސާން ވިދާޅުވީ ޑްރޯންގެ އެއްވެސް ތަފުސީލެއް އާންމު ޖަލްސާއެއްގައި ހާމަ ނުކުރައްވާނެ ކަމަށެވެ.
"އެ މައުލޫމާތު މިތާނގަ އާއްމުކުރަން އަޅުގަނޑު އުޒުރުވެރިވަން، 241 ކޮމިޓީގަ ސިއްރު ޖަލްސާއެއްގަ މި މައުލޫމާތު އަޅުގަނޑުމެންނަށް އާއްމު ކުރެވިދާނެ،" ގައްސާން ވިދާޅުވި އެވެ.
ޑްރޯންތައް ގެނެސް އެތަކެތި އިފުތިތާހުކޮށްފައި ވަނީ މި ހިނގާ މާޗް 15، ގަ އެވެ. އޭގެ ކުރިން ޑްރޯންތަކާ ބެހޭ އެއްވެސް މައުލޫމާތެއް ސަރުކާރުން ހާމައެއް ނުކުރެ އެވެ. ޑްރޯންތައް ގެނައުމަށްފަހު އެއާ ކޯ ގެ ނަމުގައި ސިފައިންގެ ވައިގެ ގޮތްޕެއް ވެސް ވަނީ އުފައްދައިފަ އެވެ.
