ރައީސް މުހައްމަދު މުއިއްޒުގެ ސަރުކާރަށް ކުރީ ސަރުކާރޭ ބުނުމުގެ ހައްގު މިހާރު ގެއްލިފައިވާ ކަމަށް އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
ކުރިއަށް އޮތް ރައްޔިތުންގެ މަޖިލިސް އިންތިހާބުގެ ކެމްޕޭނަށް މ. ރަތްމަންދޫއަށް ވަޑައިގެން އެރަށުގައި ހުންނަވައި ވީޑިއޯ މެދުވެރިކޮށް އެމްޑީޕީގެ ރައީސް، އަބްދުﷲ ޝާހިދު ދެއްކެވި ވާހަކައާ ގުޅިގެން ސަރުކާރުގެ މިނިސްޓަރުންނާއި ރައީސުލްޖުމްހޫރިއްޔާ ހިމެނޭހެން މުޅި ސަރުކާރު ގެންދަނީ ސަރުކާރުގެ ދިފާއުގައި ވާހަކަ ދައްކަވަމުންނެވެ.
އެ ވީޑިއޯގައި ޝާހިދު ފާހަގަކުރެއްވީ ޕްރޮޖެކްޓުތައް ހުއްޓިފައިވާ ވާހަކަ އެވެ. އެކަމާ ގުޅިގެން ކުރެއްވި ޓްވީޓެއްގައި ފައްޔާޒު ވެސް ވިދާޅުވީ "ކޮންމެ ރަށަކުން ފެންނަނީ ހުރިހާ ޕްރޮޖެކްޓެއް ހުއްޓިފައި" ވާ މަންޒަރު ކަމަށެވެ.
"ސަރުކާރާ ހަވާލުވީ ތިމަންނާއަށް ވާނެ އޭ ކުރާނަމޭ. މިހާރު ދެން ކުރީ ސަރުކާރޭ ކިއުމުގެ ހައްގެއް ނެތް. އަމިއްލައަށް ހަވާލުވީ ހުރިހާ ކަމެއް ކުރާނަމޭ ކިޔާފަ. ހެދި ދޮގުން ސަލާމަތް ވާން ނިއުޒިލޭންޑް ބޭފުޅުންވެސް ނެރެގެން އަނެއްކާވެސް ދޮގު," މިދިޔަ ސަރުކާރުގައި އިކޮނޮމިކް މިނިސްޓަރުކަން ވެސް ކުރެއްވި ފައްޔާޒު ވިދާޅުވެފައިވެ އެވެ.
މި ސަރުކާރު ވެރިކަމާ ހަވާލުވުމަށް ފަހު ފާޑުކިޔުމާއި ޕްރެޝަރު އިތުރުވާ ދަނޑިވަޅުތަކުގައި އެކަންކަން މެދުވެރިވީ ކުރީ ސަރުކާރުގެ އިހުމާލުތަކުން ކަމަށް އަންނަނީ ބުނަމުންނެވެ. އެކަމާ ގުޅިގެން އާންމުންގެ ފާޑުކިޔުންތައް ވެސް ވަނީ ސަރުކާރަށް އަމާޒުވެފަ އެވެ.
އެމްޑީޕީން ބުނަމުންދަނީ ސަރުކާރުން ސިޔާސީ ގޮތުން ރައްދު ދިނުމުގެ ބަދަލުގައި ވެސް ރައްޔިތުންނަށް އޮޅުވާލައި ދޮގު ހަދަމުންދާ ކަމަށެވެ.
މިދިޔަ ދެ ދުވަހެއްހާ ދުވަހު އެމްޑީޕީ އާއި ސަރުކާރުގެ ވެރިންނާ ދެމެދު މި މައްސަލާގައި ބަހުގެ ހޫނު ހަމަލާތަކެއް ސޯޝަލް މީޑިއާގައި ދަނީ ބަދަލުކުރަމުންނެވެ. އެގޮތުން, ސަރުކާރުގެ ބައެއް ވެރިން ވަނީ އެމްޑީޕީގެ ފިކުރު ނައްތާލަން ޖެހޭ ކަމަށް ވެސް ބުނެފަ އެވެ.
އޭގެ ތެރެއިން, ސަރުކާރުގެ ވެރިންގެ ޕޯސްޓުތަކުގައި ޒިންމާދާރު މަގާމެއްގައި ހުންނައިރު، ހިފަހައްޓަންޖެހޭ އަހުލާގީ އާންމު މިންގަނޑަށްވުރެ ދަން ފެންވަރުގެ ބަހުރުވަ ބޭނުންކޮށްފައި ވާތީ އާންމުންގެ ފާޑު ކިޔުން ވެސް އެ ބޭފުޅުންނަށް އަމާޒުވެފައިވެ އެވެ.
