އިންޑިއާގެ އިދިކޮޅު މައި ޕާޓީ، ކޮންގްރެސް ޕާޓީގެ އެކައުންޓުތައް ފްރީޒް ކުރުމުން ކެމްޕޭން ކުރުމަށް އުނދަގޫތައް ކުރިމަތިވަމުން އަންނަ ކަމަށް އެ ޕާޓީން ބުނެފި އެވެ.
ކޮންގްރެސް ޕާޓީގެ ކުރީގެ ލީޑަރު އަދި އިންޑިއާގެ ގާނޫނު ހަދާ މަޖިލީހުގެ މެމްބަރު ރާހުލް ގާންދީ ވިދާޅުވީ އެ ޕާޓީގެ އެކައުންޓު ފްރީޒް ކުރުމާއެކު، ކެމްޕޭނަށް ހޭދަކުރާނެ ފައިސާއެއް މިހާރު ނެތް ކަމަށެވެ.
ޕާޓީގެ ކެންޑިޑޭޓުންނަށް ތާއީދު ހޯދުމަށް ދަތުރުތައް ކުރުމާއި، ކެމްޕޭން އިވެންޓުތައް ބޭއްވުމަށް އުނދަގޫތައް އަންނަނީ ދިމާވަމުން ކަމަށާއި، މިއީ އިންސާފުވެރި ގޮތެއްވެސް ނޫން ކަމަށް ރާހުލް ގާންދީ ވިދާޅުވި އެވެ.
ޓެކްސްގެ މައްސަލައެއްގައި ކޮންގްރެސް ޕާޓީގެ އެކައުންޓުތައް ފްރީޒް ކުރީ މި މަހުގެ ކުރީކޮޅެވެ. އޭރު އެ ޕާޓީގެ އެކައުންޓުގައި މިލިއަނުން ގިނަ ޑޮލަރު ހުރި ކަމަށް ރިޕޯޓްތައް ބުނެ އެވެ.
ކޮންގްރެސް ޕާޓީން ތުހުމަތު ކުރާ ގޮތުގައި އެ ޕާޓީގެ އެކައުންޓުތައް ފްރީޒްކުރީ ދުރާލައި ރާވައިގެން އިންތިހާބު ބޯމަތިވުމާއެކުގަ އެވެ. އެގޮތުން މިކަމުގެ ފަހަތުގައި ހުންނެވީ އިންޑިއާގެ ބޮޑުވަޒީރު ނަރެންދުރަ މޯދީ ކަމަށްވެސް އެ ޕާޓީން ތުހުމަތު ކުރެ އެވެ.
އިންޑިއާގެ އާންމު އިންތިހާބު ކުރިޔަށް ގެންދާނީ އޭޕްރިލް 19، އިން ފެށިގެން ޖޫން 1، ގެ ނިޔަލަށް ހަތް ފޭސް އަކަށް ބަހާލައިގެންނެވެ. އިންތިހާބުގައި 967 މިލިއަނެއްހާ މީހުންނަށް ވޯޓުލުމުގެ ހައްގު ވަނީ ލިބިފަ އެވެ.
