އަންނަ މަހު އޮތް ރައްޔިތުންގެ މަޖިލީހުގެ އިންތިހާބުގައި ވެރިކަން ކުރާ ޕާޓީއަށް މެޖޯރިޓީ ދީފިނަމަ ސިޔާސީ މީހުން ހައްޔަރުކޮށް އަނިޔާވެރިވާ މަންޒަރު ފެންނާނެ ކަމަށް އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
އެ ޕާޓީގެ ޓިކެޓުގައި ރައްޔިތުންގެ މަޖިލީހުގެ މައްޗަންގޯޅި އުތުރު ދާއިރާއަށް ވާދަކުރައްވާ ޟިރުޣާމް ވަހީދުގެ ކެމްޕޭން ޖަލްސާގައި ފައްޔާޒު ވިދާޅުވީ ސަރުކާރުގެ އަމަލުތައް މިހާރު ހުރި ގޮތުން މެޖޯރިޓީ ލިބިއްޖެނަމަ އަނިޔާވެރިވާނެ ކަމަށެވެ. ސަރުކާރުގެ އަނިޔާވެރިކަމުގައި ޖަލަށް ވަޑައިގަންނަވަން ޖެހުނަސް މައްސަލައެއް ނެތް ކަމަށް ވެސް އޭނާ ވިދާޅުވި އެވެ.
"އަނެއްކާ މަޖިލީހުގެ މެޖޯރިޓީ މި ބޭފުޅުންނަށް ލިބިއްޖެ ކަމަށްވާނަމަ ޝައްކެއް ވެސް ތިބޭފުޅުން ކުރައްވާނެ ކަމެއް ނެތް, ދެން ފެންނާނީ އަނިޔާވެރިކަން. އިސާހިތަކު އަޅުގަނޑުމެން ހައްޔަރުކުރަން ފަށާނެ. އެކަމަކާ ތިޔަ ބޭފުޅުން ކަންބޮޑުވާނެ ކަމެއް ނެތް," މިދިޔަ ސަރުކާރުގައި އިކޮނޮމިކް މިނިސްޓަރުކަން ވެސް ކުރެއްވި ފައްޔާޒު ވިދާޅުވި އެވެ.
ސަރުކާރުގެ ކަންކަން ހުރީ ވަރަށް ބޮޑަށް ކަންބޮޑުވާ މިންވަރެއްގައި ކަމަށާއި ކުރިން ރާއްޖެ އޮތް ގޮތަށް ކަންކަން ބަދަލުކުރުމަށް މަސައްކަތް ކުރަމުންދާ މަންޒަރު ފެންނަމުންދާ ކަމަށް ފައްޔާޒު ވިދާޅުވި އެވެ.
"ވަރަށް ރީތިކޮށް އަނދުން އަޅުވާލައިގެން މިގޮތަށް ރައްޔިތުންނަށް ދައްކައިގެން ވަރަށް ބޮޑެތި ދޮގުތަކެއް ހަދައިގެން ވެރިކަމަށް ޑރ. މުއިއްޒު ވަޑައިގެންނެވި. އެކަން މިހާރު ހުރިހާ ރައްޔިތުންނަށް ވަރަށް ބޮޑަށް ސާފުވެއްޖެ. ކޮންމެ ވާހަކައެއް, ކޮންމެ ވައުދެއްވީ ދޮގު ވައުދަކަށް. އެކަންތައް މިހާރު ފެންނަމުންދަނީ," ފައްޔާޒު ވިދާޅުވި އެވެ.
އެމްޑީޕީއަކީ އަބަދުވެސް ރާއްޖޭގައި އަނިޔާވެރިކަމާ ދެކޮޅަށް މަސައްކަތް ކުރާ ހެޔޮ ވެރިކަމެއް ކުރުމަށް ބާރުއަޅާ ޕާޓީ ކަމަށް އޭނާ ވިދާޅުވި އެވެ. އެގޮތުން, އެ ޕާޓީން ކުރި ދެ ވެރިކަމުގައި ވެސް އެ ކަން ސާބިތުކޮށްދީފައިވާނެ ވެސް އެމްޑީޕީގެ އެންމެ އިސް ލީޑަރެއްގެ ގޮތުގައި މިވަގުތު ހުންނެވި ފައްޔާޒު ވިދާޅުވި އެވެ.
"މިދިޔަ ފަސް އަހަރު ކާކުތޯ ހައްޔަރުކުރީ. މިދިޔަ ފަސް އަހަރު ކާކުގެ މުދަލެއްތޯ ސަރުކާރުން ނެގީ. އަޅުގަނޑުމެންނާ ދިމާލަށް ކޮރަޕްޝަނާ އޭތިމީތި ކިޔައި ހެދި. ބައްލަވާ އެކަމަކު މިއަދު ލޮލުން އެސްފިޔަ ނުޖަހައި އެހެރަ ކޮރަޕްޝަންގެ އަމަލު ހިންގަމުންދަނީ," ފައްޔާޒު ވިދާޅުވި އެވެ.
މަޖިލިސް އިންތިހާބު ތާވަލުކޮށްފައި ވަނީ އެޕްރީލް 21, އަށެވެ. އެމްޑީޕީން 90 ދާއިރާއަކަށް މިފަހަރުގެ އިންތިހާބުގައި ވާދަކުރެ އެވެ. އެ ޕާޓީގެ ކެމްޕޭނު ހަރަކާތްތައް ރާއްޖޭގެ އެކިކަންކޮޅުގައި މިހާރު ދަނީ ހިންގަމުންނެވެ.
