ރައްޔިތުންގެ މަޖިލީހުގެ ކެލާ ދާއިރާގެ އެމްޑީޕީ މެންބަރު އިބްރާހީމް ޝަރީފު އަމިއްލަ ކަމެއްގައި ރައްޔިތުންގެ މަޖިލީހުގެ މިއަދުގެ ޖަލްސާގައި ހޯމް މިނިސްޓަރު އަލީ އިހުސާންއާ ސުވާލުކުރައްވައި، އެ މައްސަލަ "ބޮޑު ކަަމަކަށް" ހައްދަވައިފި އެވެ.
ރައްޔިތުންގެ މަޖިިލީހުގެ މިއަދުގެ ޖަލްސާއަށް ހޯމް މިނިސްޓަރު އަލީ އިހުސާން ވަޑައިގެންނެވީ ވަޒީރުންނާ ސުވާލުކުރުމުގެ ވަގުތުގައި އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ކުރެއްވި ސުވާލަކާއި އެ ސުވާލާ ގުޅިގެން މެންބަރުން ކުރައްވާ ސުވާލުތަކަށް ޖަވާބުދެއްވުމަށެވެ.
ޝިފާއު ކުރެއްވި އެއް ސުވާލަކީ، "ޑިސެމްބަރު 17، 2023 ، ގެ ނިޔަލަށް ރާއްޖޭގައި ވަޒީފާ އަދާކުރުމަށް ޓަކައި ބަންގްލަދޭޝްގެ ރައްޔިތުން ތިބި އަދަދަކީ ކޮބައިތޯ؟" އެވެ. ދެވަނަ ސުވާލަކީ ނޮވެމްބަރު 12، އިން ފެށިގެން ޑިސެމްބަރު 17، އާ ހަމައަށް ރާއްޖޭން ފުރި ބަންގްލަދޭޝް މީހުންގެ އަދަދަކީ ކޮބައިތޯ؟" އެވެ.
އެ ސުވާލަށް މިނިސްޓަރު ޖަވާބު ދެއްވުމާ އެކު ގުޅުން ހުރި ބައެއް ސުވާލުތައް އެހެން ބައެއް މެންބަރުން ކުރެއްވި ފަހުން ކެލާ ދާއިރާގެ މެންބަރު ޝަރީފު ސުވާލުކުރެއްވީ އޭނާ ކުއްޔަށް ދޫކުރައްވައިގެން އުޅުއްވާ ތަނެއްގައި ތިބި ބަޔަކު ކުލި ނުދައްކާތީ ފުލުހުންނަށް ހުށަހަޅައިގެން ކުރިއަށް ނުގޮސްގެން، ދެން އަމަލުކުރައްވަންވީ ގޮތަކާ ބެހޭ ގޮތުންނެވެ.
"އިއްޔެ މި ގަޑީގައި އަޅުގަނޑު ހުރީ ހެންވޭރު ޕޮލިސް ސްޓޭޝަނުގައި، އަޅުގަނޑު ކުއްޔަށް ދީފައި ހުރި ތަނަކުން ކުލި ނުދައްކައިގެން، ބޭރު މީހަކު، އެކަން ވީ ގޮތަކީ ފުރަތަމަ ކުއްޔަށް ދިނީ ދިވެއްސަކަށް، އޭނާ ފިލައިގެން ގޮސްފި، ދެން ހުރީ ބޭރު މީހެއް، އޭނާ ބުނީ ތިމަންނާ ޒިންމާވާނަމޭ، އޭނާ ކުއްޔެއް ނުދައްކާ، އެ ތަނަކުން ނުނިކުމޭ،" ހެންވޭރު ޕޮލިސް ސްޓޭޝަނަށް ހުށަހެޅުއްވި މައްސަލަ ތަފްސީލުކޮށް ދެއްވަމުން ޝަރީފު ވިދާޅުވި އެވެ.
އެ އީ މަދަނީ މައްސަލައެއް ކަމަށާއި ވަޑައިގަންނަވަން ޖެހޭނީ ސިވިލް ކޯޓަށް ކަމަށް ހެންވޭރު ޕޮލިސް ސްޓޭޝަނުން ޝަރީފަށް ޖަވާބު ދެމުން ބުނިކަން އޭނާގެ ވާހަކައިން އެނގެ އެވެ.
ވާހަކައެއް ކިޔައިދޭ އުސޫލުން އެވާހަކަ ވިދާޅުވެފައި "ޝުކުރިއްޔާ"އޭ ވިދާޅުވެ، އިށީންނަވަން އުޅުއްވަމުން ޝަރީފު އެއްސެވީ އެ ކަހަލަ މައްސަތަކުގައި އަމަލުކުރާނީ ކިހިނެތްތޯ" އެވެ.
ރިޔާސަތުން މަޖިލީހުގެ ރައީސް މުހައްމަދު އަސްލަމް ވިދާޅުވީ ޝަރީފުގެ ވާހަކައިން ސުވާލެއް ފާހަގަ ނުވާ ކަމަށެވެ. އެހެން ވިދާޅުވެ، ސުވާލުކުރުމުގެ ފުރުސަތު ދެއްވީ އެހެން މެންބަރަކަށެވެ.
އޭފެ ފަހުން ނިޒާމާ ބެހޭ މައްސަލައެއް ކަމަށް ވިދާޅުވެ ފުރުސަތެއް ހޯއްދަވައިގެން، ޝަރީފު އޭނާގެ ސުވާލުގެ އިބާރާތް ބަދަލުކުރައްވައި، "އެއީ ވަރަށް ގިނަ ދިވެހިންނަށް ދިމާވާ ކަމެއް ކަމަށެވެ. އެހެން ނަމަވެސް އެ ސުވާލަށް މިނިސްޓަރު ޖަވާބު ދެއްވަން ރިޔާސަތަކުން ނޭދެ އެވެ.
