އިންޑިއާގެ ހުޅަނގު ގުޖުރާތުގެ ޔުނިވާސިޓީއެއްގައި ހޮނިހިރު ދުވަހުގެ ރޭ ތަރާވީސް ނަމާދު ކުރަނިކޮށް ބިދޭސީ ދަރިވަރުންތަކަކަށް ބަޔަކު ހަމަލާދީފި އެވެ.
އިންޑިއާގެ ނޫސްތަކުން ބުނީ ޔުނިވާސިޓީ ތެރެއަށް ވަދެ ދިން މި ހަމަލާގައި ހަތަރު ބިދޭސީ ހަތަރު ދަރިވަރަކު ޒަހަމްވި ކަމަށެވެ.
ދަރިވަރުންނާ ހަވާލާދީ އިންޑިއާގެ ނޫސްތަކުން ބުނީ ތަރާވީސް ނަމާދު ކުރަމުންދިޔައީ 15 ދަރިވަރުން ކަމަށާއި، ހަމަލާދިން މީހުން ޔުނިވާސިޓީއަށް ވަނީ ދަނޑިބުރި އާއި ވަޅިފަދަ ހަތިޔާރު ހިފައިގެން ކަމަށެވެ.
ހަމަލާގައި އަފްޣާނިސްތާން، އުޒްބަކިސްތާނު، ލަންކާ އަދި ބަންގްލަދޭޝްގެ އިތުރުން އެފްރިކާގެ އެކި ގައުމުތަކުގެ ދަރިވަރުން ޒަހަމްވި ކަމަށްވެސް ނޫސްތަކުން ބުނެ އެވެ.
ހަމަލާދިން ފަހުން ޔުނިވާސިޓީ ދޮށަށް ގިނަ އަދަދެއްގެ ބަޔަކު އެއްވި ކަމަށާއި، ޔުނިވަސިޓީގެ ކޮޓަރިތަކުގެ އިތުރުން ބައެއް ތަކެއްޗަށްވެސް ގެއްލުން ދިން ކަމަށް ދަރިވަރުން ވަނީ ބުނެފަ އެވެ.
ހަމަލާއާ ގުޅޭ ވީޑިއޯތައް ސޯޝަލް މީޑިއާގައި ދައުރުވަމުން އަންނައިރު، ގިނަ ބަޔަކު އަންނަނީ ކަންބޮޑުވުން ފާޅު ކުރަމުންނެވެ.
މި ހަމަލާއާ ގުޅިގެން އިންޑިއާގެ މިނިސްޓްރީ އޮފް އެކްސްޓާނަލް އެފެއާޒް އިން ބުނީ ހަމަލާދިން މީހުން ހޯދައި ހަރުކަށި އަދަބު ދޭނެ ކަމަށެވެ.
އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވީ ހަމަލާއާ ގުޅިގެން ތަހުގީގެއް މިހާރު ފަށާފައިވާ ކަމަށާއި، ސީރިއަސް ގޮތެއްގައި މައްސަލަ ބަލާނެ ކަމަށެވެ.
