އިންޑިއާގެ އާންމު އިންތިހާބުގެ ވޯޓުލުން ހަތް ފޭހަކަށް ބަލަހާލައިގެން ކުރިޔަށް ގެންދިޔުމަށް އިލެކްޝަން ކޮމިޝަން އޮފް އިންޑިއާ (އީސީއައި) އިން ނިންމައިފި އެވެ.
ނޫސްވެރިންނަށް މައުލޫމާތު ދެއްވަމުން އިންޑިއާގެ ޗީފް އިލެކްޝަން ކޮމިޝަނާ ރާޖީވް ކުމާރު ވިދާޅުވީ އިންތިހާބު ކުރިޔަށް ގެންދާނީ އޭޕްރިލް 19، އިން ފެށިގެން ޖޫން 1، ގެ ނިޔަލަށް ހަތް ކަމަށެވެ.
ވޯޓު ނަތީޖާ އިއުލާނު ކުރާނީ ޖޫން 4ގަ އެވެ.
އިންތިހާބުގައި ވޯޓުލާ ފޭސްތައް ބެހިފައިވާ ގޮތް:
- ފޭސް 1 - ވޯޓުލުން ކުރިޔަށްދާނީ އޭޕްރިލް 19
- ފޭސް 2 - ވޯޓުލުން ކުރިޔަށްދާނީ އޭޕްރިލް 26
- ފޭސް 3 - ވޯޓުލުން ކުރިޔަށްދާނީ މެއި 7
- ފޭސް 4 - ވޯޓުލުން ކުރިޔަށްދާނީ މެއި 13
- ފޭސް 5 - ވޯޓުލުން ކުރިޔަށްދާނީ މެއި 20
- ފޭސް 6 - ވޯޓުލުން ކުރިޔަށްދާނީ މެއި 25
- ފޭސް 7 - ވޯޓުލުން ކުރިޔަށްދާނީ ޖޫން 1
އިންޑިއާގެ އާންމު އިންތިހާބުގައި 967 މިލިއަނެއްހާ މީހުންނަށް ވޯޓުލުމުގެ ހައްގު ލިބިފައިވާއިރު، 543 ގޮނޑިއަކަށް ކެންޑިޑޭޓުން އިންތިހާބު ކުރާނެ އެވެ.
އިންތިހާބުގައި އުމުރުން 85 އަހަރުން މަތީގެ މީހުންނަށް ގޭގައި ތިބެގެން ވޯޓުލެވޭނެ އިންތިޒާމު ވަނީ ހަމަޖައްސައިފަ އެވެ. އިންތިހާބުގެ ސަލާމަތީ ކަންކަމުގައި 15 މިލިއަން މީހުން ހަރަކާތްތެރިވާނެ ކަމަށް އީސީއައި އިން ބުނެ އެވެ.
މި އިންތިހާބުގައި 5.5 މިލިއަން ވޯޓިން މެޝިން ބޭނުން ކުރާއިރު، 1.4 ވޯޓުލާ މަރުކަޒު ހުންނާނެ އެވެ. އިންޑިއާގެ މިހާރު އޮތް ސަރުކާރުގެ ދައުރު ޖޫން 16، ގައި ހަމަވާނެ އެވެ.
