މި ހިނގާ ރޯދަ މަސް ފެށުމާއެކު ރައީސް ޑރ. މުހައްމަދު މުއިއްޒު ހައްދަވާ ދޮގުތަކުގެ ދަރަޖަ އިތުރަށް ކުރިއަށް ޖައްސާލާފައިވާ ކަމަށް އިދިކޮޅު އެމްޑީޕީން ތުހުމަތުކޮށްފި އެވެ.
ވިހި ވަނަ ރައްޔިތުންގެ މަޖިލީހަށް މެމްބަރުން ހޮވަން އަންނަ އޭޕްރިލްމަހު ބާއްވާ އިންތިހާބަށް އެމްޑީޕީން ކުރާ ކެމްޕޭނުގެ މައުލޫމާތު ދޭން އެޕާޓީން ރޭ ބޭއްވި ނޫސްވެރިންގެ ބައްދަލުވުމެއްގައި އެ ކެމްޕޭނުގެ ތަރުޖަމާނު، ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވީ، ރޯދަ މަހާއެކު ރައީސްގެ ދޮގުތައް ހުއްޓާލައްވާނެ ކަމަށް އެ ޕާޓީން ވަރަށް ބޮޑަށް އުއްމީދު ކުރި ކަމަށެވެ. ނަމަވެސް އެ މަންޒަރު ނުފެނުނު ކަމަށް ވެސް އީސަ ވިދާޅުވި އެވެ.
"އަޅުގަނޑުމެން އުއްމީދުކޮށްގެން ތިބީ އެންމެ ކުޑަމިނުން މި ރަމަޟާން މަހު އެބޭފުޅާ އެ ހައްދަވަމުން ގެންދެވި ދޮގުތައް މި ރަމަޟާން މަހަށްޓަކާ ހުއްޓަވާލައްވާނެ ކަމަށް، އެހެން ނަމަވެސް ހިތާމައަކީ އެހެނެއް ނޫން މި ފެނުނީކީ، މި ރަމަޟާން މަހު އެބޭފުޅާގެ ދޮގު ހެދުން ކުރިއަށްވުރެ ދަރަޖަ ކުރިއަށް ޖައްސާލިތަން އަޅުގަނޑުމެންނަށް މި ފެނުނީ" އީސަ ވިދާޅުވި އެވެ.
އީސަ ތުހުމަތު ކުރެއްވި ގޮތުގައި މި ސަރުކާރުން ދުވަހަކުވެސް ތެދެއް ނަހަދާނެކަން މިހާރު އެމްޑީޕީއަށް މިހާރު ސާފުވެއްޖެ އެވެ. އަދި، ދޮގުތައް ގިނަވެ، ކުދި ދޮގު، މެދު ދޮގު، ބޮޑު ދޮގު، އަދި ބުހުތާނު ދޮގުގެ ގޮތުގައި އެ ޕާޓީން 'ކެޓަގަރައިޒް' ކޮށްފައިވާ ކަމަށް އޭނާ ވިދާޅުވި އެވެ.
އެގޮތުން ބުހުތާނު ދެ ދޮގުގެ ގޮތުގައި ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރުމަކީ ރައްޔިތުންގެ މަޖިލީހުގެ މަސައްކަތެއްކަމަށް ރައީސް މުއިއްޒު ވިދާޅުވި ވާހަކަ އަދި ސަރުކާރުގެ ކުންފުނިތަކުގެ މުސާރައާއި އިނާޔާތްތައް ދިނުން އޭނާ ފާހަގަކުރި އެވެ.
