ދިވެހިރާއްޖޭގެ ކަނޑުގެ ސަރަހައްދު ބެލެހެއްޓުމަށްޓަކައި އަސްކަރީ ޑްރޯންތަކެއް ގަތުމަށް ތުރުކީގެ ކުންފުންޏަކާއެކު މި ސަރުކާރުން ވީ އެއްބަސްވުމުގެ ދަށުން ރާއްޖެއަށް ފުރަތަމަ ފަހަރަށް އަސްކަރީ ޑްރޯންތަކެއް ގެނެސްފި ކަމަށް އިއްޔެ ރިޕޯޓުކުރި އެވެ.
މި މަސައްކަތުގައި ޝާމިލުވާ ސަރުކާރުގެ އިސް އޮފިޝަލަކު "އަދަދު" އަށް ކަށަވަރުކޮށްދީފައިވާ ގޮތުގައި ތުރުކީގެ މި ޑްރޯންތައް ގެނެސްފައިވަނީ މި މަހުގެ ތިނެއްގަ އެވެ. އެ އުޅަނދުތައް މިހާރު ހުރީ ނ. މާފަރު އިންޓަނޭޝަނަލް އެއާޕޯޓުގަ އެވެ.
ނަމަވެސް އެއްބަސްވުމުގެ ދަށުން ތުރުކީއިން ރާއްޖެއަށް ގެނެސްފައިވާ ޑްރޯންތަކުގެ އަދަދު މިހާތަނަށް ކަށަވަރުވެފައެއް ނުވެ އެވެ. ސަރުކާރުގެ އޮފިޝަލު ބުނި ގޮތުގައި ސަރުކާރުން މަސައްކަތް ކުރަމުން ދަނީ އަންނަ ހަފުތާގެ ތެރޭގައި މި ޑްރޯންތަކުގެ އޮޕަރޭޝަން ފެށުމަށެވެ.
މިކަމާ ގުޅިގެން މިހާތަނަށް ސަރުކާރުގެ ރަސްމީ އެއްވެސް ކޮމަންޓެއް ލިބިފައެއް ނުވެ އެވެ. މި ޑްރޯންތައް ގަތްކަން ވެސް، ގެނައިކަން ވެސް، އަދި އެއްބަސްވުމުގެ އެއްވެސް މައުލޫމާތެއް، ސުވާލުކުރުމުން ވެސް ހާމައެއް ނުކުރެ އެވެ.
އިތުރަށް ކިޔާލުމަށް
