ރ. އުނގޫފާރު ރައްޔިތުން އެކިކަހަލަ މަސައްކަތް ކުރަން، އެ ރަށާއި ގާތްގަނޑަކަށް ދެ ކިލޯމީޓަރު ދުރުގައި އޮންނަ ރ. އުނގުލު ހަމަޖައްސައިދިނުމަށް މަސައްކަތް ކުރައްވާނެ ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރ. އަތޮޅަށް ކުރައްވާ ދަތުރުފުޅުގައި މިއަދު އުނގޫފާރަށް ވަޑައިގަނެ ވާހަކަދައްކަވަމުން ރައީސް ވިދާޅުވީ އުނގޫފާރަށް އިގުތިސާދީ ތަރައްގީ ގެނެއުމަށް ކުރަންޖެހޭ އެކިކަހަލަ މަސައްކަތް ކުރުމަށް އެ ރަށުގައި ޖާގަ ނެތް ކަމަށެވެ. އަދި ބިން ހިއްކައިގެން ވެސް އެ ރަށުން މަސައްކަތްކުރުމަށް ޖާގަ ނުލިބޭނެ ކަމަށް ވިދާޅުވި އެވެ.
"އިގުތިސާދީ ތަރައްގީ ހާސިލުކުރުމަށް އެކިކަހަލަ މަސައްކަތް ކުރުމަށް ޖާގަ ނެތީމަ، މި ހިއްކާ ބިމަކުން ވެސް އެކަމަށް ނުވާނެ މިރަށުގެ ދުރު ރާސްތާގެ ތަރައްގީއަށް މަސައްކަތް ކުރާނަމަ،" އެމަނިކުފާނު ވިދާޅުވި އެވެ.
އުނގޫފާރުގެ ތަރައްގީއަށް ބޭނުންވާ ޖާގަ ހަމަޖެއްސެވުމުގެ ގޮތުން ރ. އުނގުލު ހޯދައިދޭނެ ކަމަށް ރައީސް ވިދާޅުވި އެވެ. އެގޮތުން ރ. އުނގުލާއި ގުޅޭ އެއްވެސް އެގްރީމެންޓެއް ހެދިފައިވޭތޯ ބަލައި، ކޯޓުގައި މައްސަލައެއް އޮތްތޯ ބެލުމަށްފަހު އުނގޫފާރު ރައްޔިތުންނާއި އެ ރަށް ހަވާލުކޮށްދެއްވާނެ ކަން ރައީސް ފާހަގަކުރެއްވި އެވެ.
"އެއްވެސް ކަހަލަ އެގްރީމެންޓެއް [ރ. އުނގުލާއި ގުޅޭ] ބަޔަކާ ހަދާފަ އޮތްތޯ، ކޯޓުގަ އެއްވެސް މައްސަލައެއް އޮތްތޯ، ކުރީ ސަރުކާރުން އެއްވެސް ބަޔަކާ ގުޅުވާފަ އޮތްތޯ ބަލަން ޖެހޭނެ. އެކަމެއްގެ ތެރެއިން އެ ރަށް ސަލާމަތްކޮށްގެން މި ރަށާ އެ ރަށް ހަވާލުކޮށްދޭނަން،" ރައީސް މުއިއްޒު ފާހަގަކުރެއްވި އެވެ.
ރ. އުނގޫފާރު ރައްޔިތުންނައި އުނގުލު ހަވާލުކޮށްދޭނެ ކަމަށް ރައީސް ވިދާޅުވި. ދެ ރަށުގެ ދޭތެރޭގައި ހުންނަނީ ގާތްގަނޑަކަށް 2 ކިލޯމީޓަރުގެ ދުރުމިން -- ފޮޓޯ: ގޫގަލް މެޕްސް
އުނގޫފާރު ހޮސްޕިޓަލު ތަރައްގީކޮށް، އެ ރަށު ސުކޫލުގެ ކިޔެވުން އެއް ދަންފަޅިއަކަށް ބަދަލުކުރުމުގެ މަސައްކަތް ވެސް ކުރައްވާނެ ކަމަށް ވެސް ރައީސް ވަނީ ވިދާޅުވި އެވެ. އަދި އުނގޫފާރަކީ އާބަން ސެންޓަރެއްގެ ގޮތުގައި ތަރައްގީ ކުރެވިގެންދާނެ ރަށެއް ކަމުގައި އެމަނިކުފާނު ވިދާޅުވި އެވެ.
