ރޯދަ މަހު އިންތިހާބުތައް ނުބާއްވާ ގޮތަށް އިންތިހާބުތަކުގެ އާންމު ގާނޫނަށް ރައްޔިތުންގެ މަޖިލީހުން ފާސްކުރި ބިލު ތަސްދީގު ކުރުމަކީ މިހާރު ރައީސަށް އޮތް އިހުތިޔާރެއް ނޫން ކަމަށާއި ބިލު ގާނޫނެއްގެ ގޮތުގައި ޝާއިއު ކުރުން މާ ބޮޑަށް ލަސްކުރަން އުޅޭ ހާލަތުގައި ޝަރީއަތަށް ދާނެ ކަމަށް އެމްޑީޕީން ބުނެފި އެވެ.
މިހާރު އޮތް 19 ވަނަ ރައްޔިތުންގެ މަޖިލީހުގެ މެޖޯރިޓީ އޮތް އެމްޑީޕީ އާއި ޑިމޮކްރެޓްސްގެ ވޯޓުން އެ ބިލު ފުރަތަމަ ފަހަރު ފާސްކުރުމުން ރައީސް ޑރ. މުހައްމަދު މުއިއްޒު އަނބުރާ ބިލު މަޖިލީހަށް ފޮނުވާލި އެވެ. މަޖިލީހުން ދެވަނަ ފަހަރަށް އިއްޔެ އެ ބިލު ފާސްކުރީ 47 މެންބަރުންގެ ވޯޓުންނެވެ.
ނަމަވެސް މަޖިލީހުގެ ޖުމުލަ ގުނާނީ މި ވަގުތު ތިބި 80 މެންބަރުންގެ ތެރެއިން ކަމަށް ނިންމީ ގާނޫނު އަސާސީއާ ހިލާފު ކަމަށް ސުޕްރީމް ކޯޓުން މިއަދު ނިންމި އެވެ. ސުޕްރީމް ކޯޓުގެ އެ ނިންމުމުގެ ސަބަބުން، ބިލު ފާސްކުރީ ގާނޫނު އަސާސީއާ އެއް ގޮތަށްތޯ ރައީސް ޑރ. މުހައްމަދު މުއިއްޒު ސުވާލު އުފެއްދެވި އެވެ. އެ ކަމުގައި ބަންޑާރަ ނައިބުގެ ގާނޫނީ ލަފާ ހޯއްދަވާނެ ކަމަށް އެމަނިކުފާނު ވަނީ ވިދާޅުވެފަ އެވެ.
މަޖިލިސް އިންތިހާބުގެ ކެމްޕެއިނަށް އެމްޑީޕީން ކަނޑައެޅި ތަރުޖަމާނު، ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ބޭއްވި ނޫސްވެރިންގެ ބައްދަލުވުމުގައި "އަދަދު" ނޫހުން އެ ސުވާލު ކުރުމުން އޭނާ ވިދާޅުވީ ތަސްދީގު ކުރުމަކީ މިހާރު ރައީސަށް އޮތް އިހުތިޔާރެއް ނޫން ކަމަށެވެ.
އީސަ އިޝާރާތް ކުރެއްވީ ގާނޫނު އަސާސީގެ 91 ވަނަ މާއްދާގެ ށ. އަށެވެ. އޭގައި ބުނަނީ މަޖިލީހަށް ރައީސް އަނބުރާ ފޮނުވާ ބިލެއް އެއްވެސް ބަދަލެއް ނުގެނެސް މެންބަރުންގެ އަގުލަބިއްޔަތުން ފާސްކޮށްފި ނަމަ "އެ ބިލެއް ރައީސުލްޖުމްހޫރިއްޔާ ތަސްދީގުކޮށް، ސަރުކާރުގެ ގެޒެޓްގައި ޝާއިއުކުރާން ވާނެ" ކަމަށެވެ.
އީސަ ވިދާޅުވީ ބިލު ފާސްކުރީ ޖުމުލަ މެންބަރުންނަކީ 87 ކަމަށް ބެލި ނަމަވެސް ގާނޫނު އަސާސީގައި ބަޔާން ކުރާ ގޮތުގެ މަތިން މަޖިލީހުގެ ޖުމުލަ މެންބަރުންގެ އަގުލަބިއްޔަތުން ކަމަށެވެ. އަދި މީގެ ކުރިން އެފަދަ ހާލަތުގައި ފާސްކުރާ ބިލެއް ވަގުތުން ތަސްދީގު ކުރަން ޖެހޭނެ ކަމަށް ސުޕްރީމް ކޯޓުން ކަނޑައަޅާފައިވާ ހުކުމެއް ވެސް އެބަ އޮތެވެ.
"މި ވަގުތު ދާން ޖެހޭ ހާލަތެއް އޮތް ކަމަކަށް ނެތޭ ދެންނެވެނީ ވެސް ސުޕްރީމް ކޯޓުން ނިންމާފައިވާ ނިންމުމެއް މިހާރު ވެސް އެބަ އޮތް، ތަސްދީގު ކުރަން ޖެހޭނެ ކަމަށް، އެހެންވިޔަސް ދާން ޖެހޭ ހާލަތެއްގައި، ބިލު ތަސްދީގު ކުރަން ދެކޮޅު ހަދާ ފަދަ ހާލަތެއްގައި، ކޯޓަށް ދާން ޖެހެއްޖެއްޔާ ކޯޓަށް ވެސް ދާނަން،" އީސަ ވިދާޅުވި އެވެ.
މި އަހަރުގެ މަޖިލިސް އިންތިހާބު ބާއްވަން އިލެކްޝަންސް ކޮމިޝަނުން ނިންމާފައި ވަނީ މާޗު 17، ގަ އެވެ. އެއީ ރޯދަ މަހުގެ ހަތް ވަނަ ދުވަހެވެ. އިންތިހާބުތަކުގެ އާންމު ގާނޫނަށް މަޖިލީހުން ބަދަލެއް ގެނައީ މަޖިލިސް އިންތިހާބު ރޯދަ މަހަށް ވުރެ ފަސް ކުރުމުގެ ވިސްނުމުގަ އެވެ.
މަޖިލީހުން ފާސްކުރި ބިލުގައި ވަނީ ރޯދަ މަހުގެ ތެރެއަށް އިންތިހާބެއް ބާއްވަން ޖެހޭ ގޮތަށް ދިމާވާ ހާލަތްތަކުގައި އިންތިހާބު ބާއްވަނީ ރޯދަ މަސް ނިމޭތާ 10 ދުވަސް ފަހުން ކަމަށެވެ. އިންތިހާބުތަކާ ބެހޭ އާންމު ގާނޫނަށް ގެނައި އިސްލާހު ތަސްދީގުކުރި ނަމަ މަޖިލިސް އިންތިހާބު ދެން ބާއްވަން ޖެހޭނީ އޭޕްރިލް 20، ވަނަ ދުވަހަށް ފަހުގެ ތާރީހެއްގަ އެވެ.
