ނޯބެލް ސުލްހައިގެ އިނާމު ލިބުނު އޯލެގް އޯލާވް, ރަޝިއާގެ އަސްކަރިއްޔާއަށް ފާޑު ކިޔުމުން 30 މަހަށް ޖަލަށް ލައި، 1،629 ޑޮލަރުން ޖޫރިމަނާ ކުރަން އިއްޔެ ހުކުމްކޮށްފި އެވެ.
މޮސްކޯގެ ކޯޓަކުން ކުރި ހުކުމުގައި ބުނީ އުމުރުން 70 އަހަރުގެ އޯލާވް ޖަލަށްލީ ތަކުރާރުކޮށް ރަޝިއާގެ އަސްކަރިއްޔާއަށް ފާޑުކިޔުމާ ގުޅިގެން ކަމަށެވެ.
ރަޝިއާގެ އަސްކަރިއްޔާއަށް ފާޑު ކިޔަމުން އޯލާވް ބުނީ އެތަނުގައި ވަޒީފާ އަދާކުރާ ސިފައިންގެ ދަރިންނާއި، ދަރިންގެ ދަރިން ސިފައިންނާ ބެހޭ ގޮތުން ކުރިޔަށް އޮތްތަނުގައި ވާހަކަދައްކަން ލަދު ގަންނާނެ ކަމަށެވެ.
"ރަޝިއާގެ އަސްކަރިއްޔާގައި މަސައްކަތްކުރާ ސިފައިން އަމަލުކުރި އޯޑަރުތަކަށް ބޯލަނބައި ޔޫކްރެއިންގައި ހިންގަމުންދާ ގަތުލުއާންމާމެދު އެމީހުން ލަދުގަންނަން ޖެހޭނެ" އޯލާވް ބުނި އެވެ.
ރަޝިއާގެ އެންމެ ގިނަ ދުވަސްވީ އިންސާނީ ހައްގުތަކަށް ވަކާލާތުކުރާ "މެމޯރިއަލް" ގެ ކޯ-ޗެއާ އޯލާވްއަށް ނޯބެލް ސުލްހައިގެ އިނާމު ލިބުނީ 2022 ވަނަ އަހަރެވެ.
ނޯބެލް ސުލްހައިގެ އިނާމު ލިބުމުގެ ކުރިން އޯލާވްގެ ޖަމިއްޔާގެ ރަޝިއާއިން ހުއްޓުވި ނަމަވެސް، އޭނާ ވަނީ ހައްޔަރު ކުރުމާ ހަމައަށް އެ މަސައްކަތް ގައުމުގައި ކުރިޔަށް ގެންގޮސްފަ އެވެ.
ރަޝިއާ ސަރުކާރުން ވަނީ އެ ގައުމުގެ އަސްކަރިއްޔާއަށް އަދި ސަރުކާރަށް ފާޑުކިޔައި ނަފުރަތު އުފައްދާ މީހުންނަށް ހަރުކަށި އަދަބު ދީ، އެމީހުންގެ މުދާތައް ހިފެހެއްޓޭނެ ގާނޫނެއް ދާދި ފަހުން ފާސްކޮށްފަ އެވެ.
