ރައީސް ޑރ. މުހައްމަދު މުއިއްޒުގެ ސަރުކާރަށް އަނިޔާވެރިކަން އިސްނުކުރެވެނީ، އިދިކޮޅު އެމްޑީޕީގެ މެޖޯރިޓީ ރައްޔިތުންގެ މަޖިލީހުގައި އޮތުމުން ކަމަށް އެ ޕާޓީގެ ޗެއާޕާސަން ފައްޔާޒު އިސްމާއީލް މިރޭ ވިދާޅުވެއްޖެ އެވެ.
އަންނަ ރައްޔިތުންގެ މަޖިލީހުގެ އިންތިހާބުގެ ކެމްޕެއިން ލޯންޗު ކުރަން މިރޭ ބޭއްވި ޖަލްސާގައި ވާހަކަ ދައްކަވަމުން ފައްޔާޒު ވިދާޅުވީ މިހާރު ވެރިކަމުގައި ތިއްބެވި ބޭފުޅުން 2013 އިން 2018 އަށް، ވެރިކަން ހިންގެވި ގޮތް ބައެއް އާންމުންގެ ހަނދާނުގައި މިއަދު ނެތް ކަމަށެވެ.
އޭނާ ގަބޫލު ކުރައްވާ ގޮތުގައި އެ ކަން ހަނދާނުން ފުހޮވިގެން ދިޔައީ 2018، ގެ ފަހުން އެ ޕާޓީގެ ސަރުކާރު އަދި ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ހައްގުތައް ކަށަވަރުކޮށްދީ އަމާން މާހައުލެއް ގައުމުގައި ގާއިމުކުރެވުމުން ކުރީގެ ހަނދާންތައް ވަގުތުކޮޅަކަށް ފުހޮވިގެން ދިޔުމުން ކަމަށެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި ހިނގި ބައެއް ކަންކަން ފައްޔާޒު ފާހަގަ ކުރެއްވި އެވެ. އެ ގޮތުން ޓީވީ ސްޓޭޝަންތައް ޖޫރިމަނާ ކުރުމާއި، އޭރުގެ އިދިކޮޅު ހުރިހާ ލީޑަރުން ޖަލަށް ލުމާއި، އެހެން ސިޔާސީ މީހުނާއި ބައެއް ފަނޑިޔާރުން ޖަލަށް ލުން ފާހަގަ ކުރެއްވި އެވެ.
މި ސަރުކާރުގައި ވެސް އޭގެ ސިފަތައް ފެންނަ ކަމަށް ފައްޔާޒު ތުހުމަތު ކުރި އެވެ. އޭގެ އިތުރަށް ދިވެހި އިގުތިސޯދު މި ސަރުކާރަށް މެނޭޖު ވެސް ނުވާ ކަމަށް އޭނާ ވިދާޅުވި އެވެ.
"އިގުތިސޯދު ކުރިއަށް ގެންދެވޭނޭ، ދަރަނި ދެއްކޭނޭ، ބުނެ ވެރިކަމަށް އައީ، އެކަމަކު މިއަދު ނާގާބިލު ކަމުގައި ރާއްޖޭގެ އިގުތިސޯދު ހީނަރުވެގެންދާ ތަން ފެންނަނީ،" ފައްޔާޒު ވިދާޅުވި އެވެ.
މީގެ ކުރިން މަޖިލީސް މެންބަރަކަށް ވެސް އުޅުއްވި ފައްޔާޒު ވިދާޅުވީ ރާއްޖޭގެ ޑިމޮކްރެސީ ހިމާޔަތްކޮށް ސަލާމަތުގައި ދެން ވެސް ތިބެވޭނީ އެމްޑީޕީގެ މެޖޯރިޓީ އޮތް މަޖިލީހެއް އޮވެގެން ކަމަށެވެ.
"އެމްޑީޕީގެ މެޖޯރިޓީ [ރައްޔިތުންގެ މަޖިލީހުގައި] އޮތަތީވެ މިއަދު ވެސް އަނިޔާވެރިކަމަށް ދާން ނުކުރިގެން އެ އުޅެނީ،" އޭނާ ވިދާޅުވި އެވެ.
ރާއްޖޭން މި ފަހުގެ ތާރީހުގައި ދިވެހިންނަށް ލިބުނު އިގުތިސޯދީ އަދި އިޖުތިމާއީ ކޮންމެ ކުރިއެރުމެއްގެ ފަހަތުގައި ވެސް ވަނީ އެމްޑީޕީ ކަމަށް ފައްޔާޒު ވިދާޅުވި އެވެ.
އެމްޑީޕީގެ ފުރަތަމަ ސަރުކާރުގައި ތައާރަފުކުރި ޓެކްސްގެ ނިޒާމާއި، އިޖުތިމާއީ ރައްކާތެރިކަމުގެ ނިޒާމުގެ އިތުރުން ދެވަނަ ސަރުކާރުގައި އަތޮޅުތެރޭގެ ރަށްރަށުގައި ހިންގި މަޝްރޫއުތަކާއި ހިލޭ ޑިގްރީ އާއި، ކޮވިޑް-19 ގެ ހާލަތު މެނޭޖު ކުރި ގޮތް އޭނާ ފާހަގަ ކުރެއްވި އެވެ.
