އިންޑިއާގައި މިދިޔަ އަހަރު މުސްލިމުންނާ ދެކޮޅަށް ނަފުރަތު އުފެއްދުން ވަރަށް ބޮޑަށް އިތުރުވެގެން ދިޔަ ކަމަށް ދިރާސާއަކުން ދައްކައިފި އެވެ.
އިންޑިއާގެ ހޭޓް ލެބުން އާންމުކުރި ދިރާސާއިން ދައްކާ ގޮތުގައި މިދިޔަ އަހަރުގެ ފުރަތަމަ ހަ މަސް ދުވަހާ އަޅާ ބަލާއިރު، ފަހު ހަ މަސް ދުވަހުގެ ތެރޭގައި މުސްލިމުންނާ ދެކޮޅަށް ނަފުރަތު އުފެއްދުން 62 ޕަސަންޓު އިތުރުވި އެވެ،
މި ދިރާސާއިން ދައްކާ ގޮތުގައި އިސްލާމް ދީނާ ދެކޮޅަށް އެންމެ ބޮޑަށް ނަފްރަތު އުފައްދާފައިވަނީ އިޒްރޭލް-ގާޒާ ހަނގުރާމައާ ގުޅިގެންނެވެ.
އިސްލާމް ދީނާ ދެކޮޅަށް ނަފުރަތު އުފެއްދުމަށް މިދިޔަ އަހަރު 668 ތަގުރީރު ދީފައިވާއިރު، އޭގެ ތެރެއިން 255 ތަގުރީރު ދީފައި ވަނީ ފުރަތަމަ ހަ މަސް ތެރޭގަ އެވެ. އަދި ފަހު ހަ މަސް ތެރޭގައި 413 ތަގުރީރު ވަނީ ދީފަ އެވެ.
މިދިޔަ އަހަރުގެ އޮކްޓޯބަރު 7 އިން ޑިސެމްބަރު 31 ގެ ނިޔަލަށް 41 ތަގުރީރެއް ގާޒާ ހަނގުރާމައާ ގުޅިގެން ނަފްރަތު އުފެއްދުމަށް ދީފައި ކަމަށް ދިރާސާއިން ދައްކަ އެވެ.
އިންޑިއާގައި ފާއިތުވި އަހަރުތަކުގައި މުސްލިމުންނާ ދެކޮޅަށް ހިންގާ ހަރަކާތްތައް އިތުރުވެގެން ގޮސްފައި ވާއިރު، މި އަހަރު ތެރޭގައި އެ ގައުމުގެ ގިނަ ދުވަސްވީ މިސްކިތްތައް ވެސް ވަނީ ބިމާ ހަމަކޮށްފަ އެވެ.
މީގެ އިތުރުން އިންޑިއާ ސަރުކާރުގައި ހިމެނޭ ފަރާތްތަކުން ވެސް އަންނަނީ ފާޅުގައި މުސްލިމުންނަށް އަދި އިސްލާމް ދީނަށް ނަފުރަތު އުފެއްދުމަށް ހަރަކާތްތައް ހިންގަމުންނެވެ.
