ބެލަރޫސްގެ ރައީސް އެލެގްޒެންޑާ ލުކަޝެންކޯ ހަތް ވަނަ ދައުރަކަށް ކުރިމަތިލައްވަން ނިންމަވައިފި އެވެ.
ބެލަރޫސްގެ ވެރިކަމާ 1994 ވަނަ އަހަރު ހަވާލުވެވަޑައިގެންނެވި ލުކަޝެންކޯ މިހާތަނަށް ހަ ރިޔާސީ އިންތިހާބެއް ޖެހިޖެހިގެން ކާމިޔާބު ކުރައްވާފައިވާއިރު، 2025 ގައި ބާއްވާ އިންތިހާބުގައި ވެސް ވާދަ ކުރައްވާކަން ވަނީ އިއުލާން ކުރައްވާފަ އެވެ.
ބެލަރޫސްގެ ގާނޫނު ހަދާ މަޖިލިސް އަދި ލޯކަލް ކައުންސިލް އިންތިހާބުގައި ވޯޓު ލެއްވުމަށް ފަހު ލުކަޝެންކޯ ވިދާޅުވީ އަންނަ އަހަރުގެ ރިޔާސީ އިންތިހާބުގައި ވާދަކުރައްވާނެ ކަމަށާއި، އިންތިހާބު ކާމިޔާބު ކުރުމަށް ކުރެވެން އޮތް ހުރިހާ ކަމެއް ކުރައްވާނެ ކަމަށެވެ.
"އިދިކޮޅަށް ބުނެލަން އޮތީ އަހަރެން އަންނަ އަހަރުގެ އިންތިހާބުގައި ވާދަކުރާނަމޭ. މި ގައުމަށްޓަކައި ކުރަން ޖެހުނު ކޮންމެ ކަމެއް އަހަރެން ކުރާނަން" ލުކަޝެންކޯ ވިދާޅުވި އެވެ.
ބެލަރޫސްގައި ކުރިޔަށްގެންދާ އިންތިހާބުތައް އިންސާފުވެރި ނޫން ކަމަށް އެ ގައުމުގެ އިދިކޮޅު ލީޑަރުން އަންނަނީ ބުނަމުންނެވެ. އަދި އެމެރިކާއިން ވެސް ވަނީ އެ ގައުމުގައި ކުރިޔަށްދާ އިންތިހާބުތަކާ ގުޅިގެން ކަންބޮޑުވުން ފާޅުކޮށްފަ އެވެ.
ރަޝިއާއިން ޔުކްރެއިން ހިފުމަށް ފަށާފައިވާ މަސައްކަތަށް ބެލަރޫސްއިން އެއްބާރުލުން ދެމުން އަންނައިރު، ހަނގުރާމައާއެކު ދެ ގައުމުގެ ގުޅުން ވަނީ ވަރަށް ބޮޑަށް ވަރުގަދަވެފަ އެވެ.
ލުކަޝެންކޯއާ ރަޝިއާގެ ރައީސް ލެޑިމިއާ ޕުޓިން ގުޅުން ބަދަހިކޮށްފައިވާއިރު، ކުރިޔަށް އޮތް އިންތިހާބު ބާރާއި ނުފޫޒުން ލުކަޝެންކޯ އަނެއްކާވެސް ކާމިޔާބު ކުރައްވާނެ ކަމަށް ވަނީ ބެލެވިފަ އެވެ.
ބެލަރޫސްގައި އެންމެ ފަހުން 2020 ވަނަ އަހަރު ބޭއްވި ރިޔާސީ އިންތިހާބު ލުކަޝެންކޯ ކާމިޔާބު ކުރެއްވީ 80.23 ޕަސަންޓުގެ ވޯޓާއެކުގަ އެވެ. އަދި ލުކަޝެންކޯއާ އެންމެ ކައިރިން ވާދަކުރި ކެންޑިޑޭޓަށް ލިބިފައި ވަނީ 9.9 ޕަސަންޓު ވޯޓެވެ.
