ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގެ ފުރަތަމަ 100 ދުވަސް، (ހަފްތާ 14)ގެ ތެރޭގައި ގާއިމްކުރަން މަަސައްކަތް ފަށަން ހަމަޖެހިފައިވާ ފުޓްސަލް ކޮމްޕްލެކްސް އާއި ނެޓްބޯޅަ ކޮމްޕްލެސް އެޅުމުގެ ބިން ރަސްމީކޮށް ހަވާލުކޮށްފި އެެވެ.
ފުޓްސަލް ކޮމްޕްލެކްސް އަޅަނީ ހުޅުމާލެ ފޭސް 2 ގަ އެވެ. އަދި ނެޓްބޯޅަ ކޮމްޕްލެކްސް އަޅަނީ ފޭސް 1 ގަ އެވެ. މީގެ އިން ކޮންމެ ކޮމްޕްލެކްސް އަކީ ވެސް ފަސް ދަނޑު ހިމެނޭ ގޮތަށް އަޅާ ތަންތަނެވެ. މިއީ މި ގޮތަށް، ރާއްޖޭގައި، ކުޅިވަރުގެ އިންފްރާސްޓްރަކްޗާއެއް ގާއިމްކުރާ ފުރަތަމަ ފަހަރެވެ.
ނެޓްބޯޅަ އާއި ފުޓްސަލް ކޮމްޕްލެކްސް އެޅުމަށް ބޭނުންވާ ބިން ހަވާލުކުރަން، ސްޕޯޓްސް މިނިސްޓްރީ އާއި ހައުސިން ޑިވެލޮޕްމަންޓް ކޯޕަރޭޝަން ލިމިޓެޑް (އެޗްޑީސީ) އިން އިއްޔެ ވަނީ އެއްބަސްވުމެއްގައި ސޮއިކޮށްފަ އެވެ މި އެއްބަސްވުމުގައި ސޮއިކުރެއްވީ ސްޕޯޓްސް މިނިސްޓަރު، ޢަބްދުﷲ ރާފިއު (ރާއްޕެ) އާއި ފިނޭންސް މިނިސްޓަރު، ޑރ. މުހައްމަދު ޝަފީގު އަދި އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު އެވެ.
ފުޓްސަލް އިންޑޯ އެޅުމަށް ހަމަޖައްސައިދިން ބިން:
މި އިވެންޓްގައި ވާހަކަ ދައްކަވަމުން، މިނިސްޓަރު ރާފިއު ވިދާޅުވީ، މި ގާއިމްކުރެވޭ ކުޅިވަރުގެ ހާއްސަ ދެ އިންފްރާސްޓްރަކްޗާއާ އެކު، އިންގިލާބީ ބަދަލެއް ފެނިގެންދާނެ ކަމަށެވެ. އަދި މި ފަދަ، ބޮޑެތި ކަންކަން ސަރުކާރުން ކުޅިވަރަށް ކޮށްދޭތީ، އެ ކަމުން ދޭހަވަނީ، ކުޅިވަރަށް ސަރުކާރުން ގެންގުޅޭ ހާއްސަ ސިޔާސަތު ކަމަށް ރާފިއު ވިދާޅުވި އެވެ.
އެޗްޑީސީގެ މެނޭޖިން ޑިރެކްޓަރު، ފަޒުލް ވިދާޅުވީ، ސަރުކާރުން ޒުވާނުންނަށްޓަކައި، ކޮށްދޭ މުހިންމު ކަންކަމުގައި އެޗްޑީސީގެ ފަރާތުން ވެސް ދެވުނު ހުރިހާ އެއްބާރުލުމެއް ދެމުން ގެންދާނެ ކަަމަށެވެ.
ނިމިދިޔަ ސަރުކާރުގެ ޔޫތު އެންޑް ސްޕޯޓްސް މިނިސްޓަރު، އަހުމަދު މަހުލޫފް ވަނީ ރައްޔިތުންގެ މަޖިލީހުގައި ވާހަކަ ދައްކަވަމުން، ދައުރު ނިމުމުގެ ކުރިން، ފުޓްސަލް އިންޑޯ އެއް އެޅުމުގެ މަސައްކަތް ފަށާނެ ކަމަށް ވިދާޅުވެފަ އެވެ. އެކަމަކު، ދައުރު ނިމުމުގެ ކުރިން، އެ މަސައްކަތް ފެށި ކަމުގެ އަމަލީ ކަމެއް ފެނިގެން ގޮސްފައިނުވެ އެވެ.
