ރަޝިއާގެ އިދިކޮޅު ލީޑަރު އެލެކްސީ ނަވަލްނީގެ ގަބުރު އެންމެ ފަހުން އާއިލާއާ ހަވާލުކޮށްފި އެވެ.
ދެ މައްސަލައެއްގައި 28 އަހަރުގެ ޖަލު ހުކުމެއް ތަންފީޒު ކުރަމުންދިޔަ ނަވަލްނީ މަރުވެފައި ވަނީ ރަޝިއާ ޖަލެއްގަ އެވެ.
ނަވަލްނީ މަރުވުމާއެކު އޭނާގެ ގަބުރު ހަވާލު ކުރުމަށް އާއިލާއިން ތަކުރާރުކޮށް އެދުމުންވެސް ގަބުރު ހަވާލު ކޮށްފައި ވަނީ ބަލަން ޖެހޭ އިތުރު ކަންކަން ބެލުމަށް ފަހު އަށް ދުވަސް ވަންދެން ހިފެހެއްޓުމަށްފަހު އެވެ.
ނަވަލްނީގެ މަރު ފޯމުގައި އޭނާގެ މަންމަ ސޮއިކޮށްފައިވާއިރު، ސިއްރިއްޔާތުގައި ތިން ގަޑިއިރު ތެރޭގައި ޖަނާޒާ ބޭއްވުމަށް ރަޝިއާ ސަރުކާރުން ފުރަތަމަ އެންގި އެވެ. ނަމަވެސް އެކަމަށް ނަވަލްނީގެ އާއިލާއިން އެއްބަސްވެފައެއް ނުވެ އެވެ.
މީގެއިތުރުން އާއިލާއިން އެކަމަށް އެއްބަސް ނުވެއްޖެނަމަ ސަރުކާރުން އަމިއްލައަށް ނަވަލްނީގެ ޖަނާޒާ ބާއްވާނެ ކަމަށް އިންޒާރުވެސް ދިނެވެ. ފަހުން އާއިލާއާ ގަބުރު ހަވާލުކޮށް ޖަނާޒާ ބޭނުން ދުވަހަކު ބޭއްވުމަށް ފުރުސަތު ދިނީ ކުރެވުނު މަޝްވަރާތަކަށްފަހު އެވެ.
ނަވަލްނީގެ ގަބުރު ލިބިފައިވާކަން އާއިލާއިން ކަށަވަރު ކޮށްދީފައިވާއިރު، ރިޕޯޓްތައް ބުނާ ގޮތުން އޭނާގެ ޖަނާޒާ ބާއްވާނެ ދުވަސް އިއުލާނު ކުރާނެ ކަމަށް ވަނީ ބުނެފަ އެވެ.
ނަވަލްނީ ޖަލުގައި މަރާލި ކަމަށް އޭނާގެ އާއިލާގެ އިތުރުން ބައެއް ގައުމުތަކުން ތުހުމަތު ކުރެ އެވެ. އަދި އެކަން ކުރީ ރަޝިއާގެ ރައީސް ލެޑިމިއަ ޕުޓިންގެ އިރުޝާދަށް ކަމަށްވެސް ތުހުމަތު ކުރެ އެވެ.
ނަވަލްނީ އެންމެ ފަހުން ހައްޔަރު ކުރީ 2021 ގައި ރަޝިއާއަށް ދަތުރު ކުރެއްވުމުންނެވެ.
އޭގެ ކުރިން ވިހަވުމުގެ ސަބަބުން ގިނަ ދުވަސްތަކެއް ވަންދެން ނަވަލްނީ ޖަރުމަނުގައި ފަރުވާ ހޯއްދަވާފައި ވާއިރު، އޭނާ ތުހުމަތު ކުރައްވާ ގޮތުގައި އެކަމުގެ ފަހަތުގައި އޮތީ ރަޝިއާ ސަރުކާރެވެ.
