އިންޑިއާގައި ސީއޭއާރް-ޓީ ސެލް ތެރަޕީ ދިން މީހަކު ކެންސަރުން ސަލާމަތްވެފައިވާކަން އިއުލާންކޮށްފި އެވެ.
ސީއޭއާރް-ޓީ ސެލް ތެރަޕީގެ ދަށުން ކެންސަރާ ދެކޮޅަށް ބަލި މީހާގެ ދިފާއީ ނިޒާމު ޖެނެޓިކަލީ ރީޕްރޮގްރާމް ކުރެ އެވެ.
އިންޑިއާގެ ނޫސްތަކުން ބުނީ މި ތެރަޕީ ބޭނުންކޮށްގެން ކެންސަރު ބަލިން ސަލާމަތްވެފައި ވަނީ އިންޑިއާގެ އަސްކަރިއްޔާގައި 28 އަހަރު ތަޖުރިބާ ލިބިފައިވާ މެޑިކަލް ޑޮކްޓަރެއް ކަމުގައިވާ ވީކޭ ގުޕްތާ ކަމަށެވެ.
އިންޑިއާގައި މި ފަރުވާގެ އަގަކީ 50،000 ޑޮލަރެވެ. އެހެން ގައުމަކުން ނަމަ 480،000 ޑޮލަރެވެ.
ރިޕޯޓްތައް ބުނާ ގޮތުން ޑރ.ވީކޭ ގުޕްތާ މި ތެރަޕީ ހަދާފައި ވަނީ ޓާޓާ މެމޯރިއަލް ހޮސްޕިޓަލުންނެވެ. އޭނާ މި ވަގުތު ކެންސަރުން ސަލާމަތްވެފައި ވާއިރު، މިއީ އިންޑިއާގައި މި ތެރަޕީ ދީގެން މިހާތަނަށް ކެންސަރުން ސަލާމަތްވި ފުރަތަމަ މީހާ އެވެ.
"ޑރ.ގުޕްތާ މިވަގުތު ހުރީ ކެންސަރު ބަލިން އެއްކޮށް ސަލާމަތްވެފައި" އިންޑިއަން އެކްސްޕްރެސްއަށް ދިން އިންޓަވިއުއެއްގައި ތެރަޕީ ކުރިޔަށްދިޔަ ޑޮކްޓަރު ބުންޏެވެ.
އިންޑިއާގެ ޑޮކްޓަރުން ބުނާ ގޮތުގައި މި ތެރަޕީއަކީ ކެންސަރު ބަލިން ސަލާމަތްވުމަށް ރަނގަޅު ތެރަޕީއެއް ކަމަށް އެންމެ ފަހުގެ ހޯދުންތަކުން ދައްކާ ކަމަށާއި، ނަމަވެސް މި ތެރަޕީ އެންމެ ރަނގަޅީ ކެންސަރުގެ އެންމެ ކުރީގެ ސްޓޭޖުތަކަށް ކަމަށެވެ.
މި ތެރަޕީ އިންޑިއާގައި ދޭން ފަށާފައި ވަނީ އިންސްޓިޓިއުޓް އޮފް ޓެކްނޮލޮޖީ ބޮމްބޭ އަދި ޓާޓާ ހޮސްޕިޓަލް ގުޅިގެން ކަމަށް ވާއިރު، މިއީ ބީ ސެލް ކެންސަރަށް ހާއްސަ ތެރަޕީއެކެވެ.
މި ތެރަޕީ އިންޑިއާގައި ބޭނުން ކުރުމުގެ ހުއްދަ ދީފައި ވަނީ މިދިޔަ އަހަރުގެ އޮކްޓޫބަރު 30، އެވެ. އަދި މިހާރު ތެރަޕީ އިންޑިއާގެ 10 ސިޓީއެއްގެ 30 ހޮސްޕިޓަލުން އަންނަނީ ދެމުންނެވެ.
