ހަންގޭރީގެ ބޮޑުވަޒީރު ވިކްޓޯ އޯބަން މަގާމުން އިސްތިއުފާ ދެއްވުމަށް ގޮވާލައި އެ ގައުމުގައި ބޮޑު މުޒާހަރާއެއް ބާއްވައިފި އެވެ.
ހަންގޭރީގައި މިހާރުގެ ސަރުކާރާ ދެކޮޅަށް ސޯޝަލް މީޑިއާ އިންފްލުއެންޒާސްތަކެއް އިންތިޒާމުކޮށްގެން ބޭއްވި މި މުޒާހަރާގައި އެތައް ހާސް ބަޔަކު ބައިވެރިވި އެެވެ.
އޯބަންގެ އިސްތިއުފާއަށް ގޮވާލައި ބޮޑު މުޒާހަރާއެއް ހަންގޭރީގައި ބާއްވާފައި މިވަނީ ޖިންސީ ގޯނާގެ މައްސަލައެއް ފޮރުވަން އެ ގައުމުގެ ސަރުކާރުގެ އިސްވެރިންތަކެއް މަސައްކަތް ކޮށްފައިވާތީ ކަމަށް ބުނެ އެވެ.
ޖިންސީ ގޯނާގެ މައްސަލަ ފެންމަތިވެފައި ވަނީ އެކަމުގައި ހިމެނޭ މީހަކަށް ހަންގޭރީގެ ރައީސް ކެޓަލިން ނޮވާކް މައާފް ދެއްވުމާ ގުޅިގެން ކަމަށްވާއިރު، އެކަމަނާ ވަނީ ކުށެއް ކުރެވިފައިވާ ކަމަށް އެއްބަސްވެ މިދިޔަ ހަފްތާގައި މަގާމުން އިސްތިއުފާ ދެއްވާފަ އެވެ.
ހަންގޭރީގެ ސަރުކާރާ ދެކޮޅަށް ބޭއްވި މުޒާހަރާގެ ތެރެއިން -- ފޮޓޯ: އޭޕީ
ނަމަވެސް ނޮވާކްގެ އިސްތިއުފާއާއެކު އޯބަންގެ މަގާމަށް އެއްވެސް އުނިކަމެއް ނާންނައިރު، 2026 ވަނަ އަހަރު ބާއްވާ ހަންގޭރީގެ އިންތިހާބުގެ ނިޔަލަށް އެމަނިކުފާނަށް މަގާމުގައި ދެމި ހުންނަވާނެ އެވެ.
އޯބަންގެ ޗީފް އޮފް ސްޓާފް ގުލްޔަސް ވިދާޅުވީ، ނޮވާކްގެ އިތުރުން ކުރީގެ ޖަސްޓިސް މިނިސްޓަރު ދިމާވެގެން އުޅޭ މައްސަލައިގެ ފުރިހަމަ ޒިންމާ ނަގާފައިވާ ކަމަށާއި، އެހިސާބުން މައްސަލަ ނިމިފައިވާ ކަމަށެވެ.
މީގެއިތުރުން މިފަދަ މައްސަލަތައް އިތުރަށް ތަކުރާރު ނުވުމަށް އަޅަން ޖެހޭ ފިޔަވަޅުތައް އަޅަމުންދާނެ ކަމަށްވެސް އޯބަންގެ ޗީފް އޮފް ސްޓާފް ވަނީ ވިދާޅުވެފަ އެވެ.
