ރަޝިއާގެ އިދިކޮޅު ލީޑަރު އެލެކްސީ ނަވަލްނީ ޖަލު ހުކުމެއް ތަންފީޒު ކުރައްވަމުން ގެންދަވަނިކޮށް މިއަދު މަރުވެއްޖެ އެވެ.
އުމުރުން 47 އަހަރުގެ ނަވަލްނީ މަރުވެފައިވާކަން ރަޝިއާގެ ޕްރިޒަންސް ސާވިސް އިން ބުނެފައިވާއިރު، އޭނާ މަރުވެފައި ވަނީ ކިހިނެއް ކަމެއް މިހާތަނަށް ހާމަކޮށްފައެއް ނުވެ އެވެ.
ނަވަލްނީގެ މައްޗަށް 19 އަހަރުގެ ޖަލު ހުކުމެއް މިދިޔަ އަހަރުގެ އޯގަސްޓް މަހު އިއްވާފައި ވަނީ ހަރުކަށި ފިކުރާ ގުޅޭ ދައުވާތައް ސާބިތުވުމާ ގުޅިގެންނެވެ.
މި ހުކުމުގެ ކުރިން ނަވަލްނީ ދިޔައީ ކޮރަޕްޝަނާ ގުޅޭ މައްސަލައެއްގައި ނުވަ އަހަރުގެ ޖަލު ހުކުމެއްވެސް ތަންފީޒު ކުރައްވަމުންނެވެ.
ރައީސް ލެޑިމިއަ ޕުޓިންއާ ދެކޮޅަށް ބޮޑު އެއްވުންތަކެއް ބޭއްވުމުގެ ފަހަތުގައި ހުންނެވި ނަވަލްނީގެ މައްޗަށް އިއްވި ހުކުމާ ގުޅިގެން އޭނާ އޭރުވެސް ގޮވާލީ ސަރުކާރަށް ޕްރެޝަރު ކުރުމަށެވެ.
ނަވަލްނީ އެންމެ ފަހުން ހައްޔަރު ކުރީ ޖަރުމަނުން ރަޝިއާއަށް ދަތުރު ކުރުމުން 2021 ގަ އެވެ.
އޭގެ ކުރިން ވިހަވުމުގެ ސަބަބުން ގިނަ ދުވަސްތަކެއް ވަންދެން ނަވަލްނީ ޖަރުމަނުގައި ފަރުވާ ހޯއްދަވާފައިވާއިރު، އޭނާ ތުހުމަތު ކުރައްވާ ގޮތުގައި ވިހަކުރުމުގެ ފަހަތުގައި އޮތީ ރަޝިއާ ސަރުކާރެވެ.
