ރިއޯ ޑި ޖަނެއިރޯ (ފެބްރުއަރީ 11) - އަލް ހިލާލްއާ އެކު، ނޭމާ މިދިޔަ އަހަރު ސޮއިކުރި ދެ އަހަރުގެ ކޮންޓްރެކްޓް ނިމުމުން، އޭނާ ސީނިއާ ކެރިއަރުގައި ފުރަތަމަ ކުޅުނު ބްރެޒިލްގެ ސަންޓޯސް އަށް ބަދަލުވުމުގެ ފުރުސަތު ބޮޑު ކަމަށް ބްރެޒިލްގެ މީޑިއާ ރިޕޯޓްތައް ބުނެފި އެވެ.
މިދިޔަ އަހަރު ނޭމާ، އަލް ހިލާލް އަށް ސޮއިކުރި ކޮންޓްރެކްޓްގެ ޖުމްލަ އަގަކީ، 400 މިލިއަން ޑޮލަރެވެ. ދެ އަހަރު ތެރޭ، ނޭމާ އަށް މި އަދަދު ލިބޭ މި ކޮންޓްރެކްޓް ތެރޭގައި ކޮންޓްރެކްޓްގައި ސޮއިކުރާއިރު ދޭ ބޯނަހާއި މުސާރައިގެ އިތުރުން އިސްތިހާރުގެ ޑީލްތައް ހިމެނެ އެވެ.
އެކަމަކު، އަލް ހިލާލާ އެކު ރަނގަޅަށް ކެރިއަރު ފަށައިނުގަނެވިގެން އުޅެނިކޮށް، ނޭމާ އަށް ވަނީ ސީރިއަސް އަނިޔާއެއް ކުރިމަތިވެފަ އެވެ. މީގެ ހަތަރު މަސް ކުރިން، ނޭމާގެ ކަކުލަށް ލިބުނު މި އަނިޔާގެ ސަބަބުން ދެން އޭނާ އަށް ކުޅުމަށް އެނބުރި އާދެވޭނީ، މި އަަހަރުގެ އޮގަސްޓް ހިސާބުގަ އެވެ.
ނޭމާ، އަލް ހިލާލާ އެކު ހަދާފައިވާ ކޮންޓްރެކްޓް އަންނަ އަހަރުގެ ނިލަޔަށް ހަމަވާނެ އެވެ.
ބްރެޒިލްގައި ނޭމާގެ ރިހެބިލިޓޭޝަން ކުރިއަށްދާއިރު، ދާދި ފަހުން އޭނާ ވަނީ ސަންޓޯސްގެ މެޗެއް ބަލަން ގޮސް، އެ ކްލަބްގެ ރައީސް، މާސެލޯ ޓަކްސޭރާއާ ބައްދަލުކޮށްފަ އެވެ. އެ ބައްދަލުވުމާ ގުޅޭގޮތުން، ޓަކްސޭރާ ވިދާޅުވީ، މި ބައްދަލުވުމުގައި، ސަންޓޯސްގެ ސަޕޯޓަރުންނަށް އުފާވެރި ހަބަރެއް ލިބިގެންދާނެ މަޝްވަރާއެއް ކުރެވުނު ކަމަށެވެ.
އޭނާ އިޝާރާތްކުރީ ސަންޓޯސް އަށް ނޭމާ ބައްދަލުވުމުގެ ޓްރާންސްފާއާ ގުޅޭ ވާހަކަ އެވެ.
ސަންޓޯސް ދޫކޮށް، ނޭމާ، 2013 ވަނަ އަހަރު ބާސެލޯނާ އަށް ބަދަލުވީ، ޖުމްލަ އެކު، 80 މިލިއަން ޑޮލަރުގެ ފީ އަކަށެވެ. ބާސެލޯނާ ދޫކޮށް، ނޭމާ، 2017 ވަނަ އަހަރު ޕީއެސްޖީ އަށް ބަދަލުވީ ދުނިޔޭގެ އެންމެ އަގުބޮޑު ޓްރާންސްފާގެ ގޮތުގަ އެވެ. ޕީއެސްޖީން ނޭމާގެ ސޮއި ހޯދީ، 242 މިލިއަން ޑޮލަރުގެ ފީއެއް ދައްކައިފަ އެވެ. މި ޓްރާންސްފާއާ ގުޅޭ ޓެކްސް މައްސަލަައެއްގެ ތަހުގީގެއް ފްރާންސްގައި އަދިވެސް ކުރިއަށް އެބަދެ އެވެ.
