އދ. ދިގުރަށު ސްކޫލް ހިންގުން ކުރީގެ ޕްރިންސިޕަލާ ހަވާލު ކުރުމުން ސްކޫލް ދޮށުގައި ބެލެނިވެރިން މިއަދު އިހުތިޖާޖު ކުރަން ފަށައިފި އެވެ.
ދިގުރަށު ސްކޫލްގެ ހިންގުން ކުރީގެ ޕްރިންސިޕަލާ ހަވާލުކުރަން އެޑިއުކޭޝަން މިނިސްޓްރީން ނިންމާފައި ވަނީ މިދިޔަ އަންގާރަ ދުވަހެވެ. އޭނާ މަސައްކަތަށް ނިކުމެފައި ވަނީ މިއަދު އެވެ.
ބެލެނިވެރިން އިހުތިޖާޖު ކުރަން ފެށީ ކުރީގެ ޕްރިންސިޕަލާ "ސިޔާސީ މަގުސަދެއްގައި" ސްކޫލް ހަވާލު ކުރި ކަމަށް ތުހުމަތުކޮށްފަ އެވެ.
ސްކޫލް ދޮށުގައި އިހުތިޖާޖު ކުރަމުންދާ ބެލެނިވެރިން ގޮވަމުން ދަނީ ސްކޫލްތަކުގެ ޕްރިންސިޕަލުންނަކީ ސިޔާސީ މަގާމެއް ނޫން ކަމަށާއި ސިޔާސީ ބޭނުމަށް ދަރިވަރުންގެ މުސްތަގުބަލު ފުނޑާ ނުލުމަށެވެ.
އެކަމާ ގުޅިގެން ސްކޫލްގެ ހިންގެވުމާ ހަވާލުވެ ހުންނެވި ކުރީގެ ޕްރިންސިޕަލަށް "އަދަދު" އިން ގުޅުމުން އޭނާ ވިދާޅުވީ ސްކޫލްގައި މިވަގުތު ކިޔެވުން ކުރިޔަށްދާ ކަމަށެވެ. ނަމަވެސް އިތުރު ތަފްސީލެއް އޭނާ ނުދެއްވަ އެވެ.
މައުލޫމާތު ލިބިފައިވާ ގޮތުގައި އިހުތިޖާޖު ކުރާތީ ދިގުރަށް ސްކޫލްގެ ގޭޓް ވަނީ ތަޅުލާފަ އެވެ. މިގޮތުން އިހުތިޖާޖު ކުރަމުން އަންނަނީ ސްކޫލް ގޭޓުން ބޭރުގަ އެވެ.
