ޕާކިސްތާނުގެ އާންމު އިންތިހާބުގައި އިއްޔެ ވޯޓުލައި ނިމިފައިވާއިރު، ނަތީޖާ ލިބުން ލަސްވާތީ އިންތިހާބު ގަޑުބަޑު ކުރާ ކަމުގެ ތުހުމަތު އިދިކޮޅު ކެންޑިޑޭޓުން ކުރަން ފަށައިފި އެވެ.
ޕާކިސްތާނުގެ އިންތިހާބުގެ ވޯޓުލުން ޕާކިސްތާނުގެ ގަޑިން އިއްޔެ ހެނދުނު 8:00 އިން ފެށިގެން ހަވީރު 5:00 އާ ޖަހަންދެން ކުރިޔަށް ގެންގޮސްފައިވާއިރު، ގަޑިއަށް ގިނަ ހިސާބުތަކުގައި ވޯޓުފޮށިތައް ވަނީ ބަންދުކޮށްފަ އެވެ. އަދި ވޯޓުފޮށިތައް ބަންދުކުރުމާއެކު ވޯޓު ގުނުމުގެ މަސައްކަތް ވަނީ ފަށާފަ އެވެ.
އިންތިހާބުގައި ނަތީޖާ އިއުލާންކުރުން ލަސް ކަމަށް ގިނަ ބަޔަކު އަންނަނީ ބުނަމުންނެވެ. މިއާއެކު، އިންތިހާބު ސައްހަވާނެކަމާ މެދު އިދިކޮޅު ކެންޑިޑޭޓުންގެ އިތުރުން ބައިނަލްއަގުވާމީ ޖަމިއްޔާތަކުންވެސް އަންނަނީ ސުވާލު އުފައްދަމުންނެވެ.
މިހާތަނަށް ޕާކިސްތާނުގެ އިލެކްޝަން ކޮމިޝަނުން އިއުލާން ކޮށްފައިވާ ނަތީޖާތައް ދައްކާ ގޮތުން ޖަލުގައި ހުންނެވި ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ ޕާޓީ ޕީޓީއައި އިން ތާއިދުކުރި 55 ކެންޑިޑޭޓަކު ގޮނޑި ކާމިޔާބުކޮށް، އޮތީ އެއްވަނައިގަ އެވެ.
ދެވަނައިގައި އޮތީ ޕާކިސްތާނުގެ ކުރީގެ ބޮޑުވަޒީރު ނަވާޒް ޝަރީފް އާއި އޭނާގެ ކޮއްކޮ ޝެހްބާޒް ޝަރީފްގެ ޕާޓީ ޕީއެމްއެލްއެން އެވެ. އެއީ 43 ގޮނޑިއާއެކު އެވެ. އަދި ތިންވަނައިގައި ޕީޕީޕީ އޮތީ 35 ގޮނޑިއާއެކުގަ އެވެ.
މިހާތަނަށް 139 ގޮނޑިއެއްގެ ނަތީޖާ ވަނީ އިއުލާން ކޮށްފަ އެވެ. އަދި ބާކީ 126 ގޮނޑީގެ ނަތީޖާ އަދި އިއުލާން ނުކުރެ އެވެ.
މި އިންތިހާބުގައި ޕާކިސްތާނުގެ އާބާދީގެ ގާތްގަނޑަކަށް 241 މީހުންގެ ތެރެއިން 18 އަހަރުން މަތީގެ 128 މިލިއަން މީހުންނަށް ވޯޓުލުމުގެ ހައްގު ލިބުނެވެ.
